Los colexos públicos de Begoña y García Lorca van ufiertar cine nocherniegu dende’l llunes hasta’l sábadu. El ciclu de cine «La comedia en diez décades», dientro la programación de branu del Festival Internacional de Cine de Xixón, repite la proyección de les películes ‘Fuera d’onda’, ‘Rufufú’, ‘Los viaxes de Sullivan’, ‘L’héroe del ríu’, ‘Little Miss Sunshine’ y ‘La vida de Brian’.

FUERA D’ONDA – 9 d’agostu 22h CP Begoña

Cher y Dionne, obsesionaes cola moda y con ser les más populares del so institutu de Beverly Hills, vense cola necesidá d’ayudar a los “desamparaos”. En faciendo de celestines para dos profesores, Cher toma baxo tutela a Tai, una cobarde estudiante.

RUFUFÚ – 10 d’agostu, 22h CP Begoña

Un grupu de rateros, aconseyaos por un lladruepu yá retiráu, decide preparar un gran robu nuna casa d’empeños cola esperanza de que los saque de la miseria na que viven.

LOS VIAXES DE SULLIVAN  – 11 d’agostu, 22h CP Begoña

Obsesionáu cola idea de rodar una película sobre la miseria y el sufrimientu, el direutor de cine John L. Sullivan convence a los executivos del estudiu pa que-y dexen percorrer el país mazcaritáu de vagamundu antes d’entamar a rodar. Tres un primer viaxe fallíu, conoz a una actriz rubia que, entusiasmada col so proyectu, decide acompañalu na so aventura

L’HÉROE DEL RÍU –  12 d’agostu, 22h CP García Lorca

Los propietarios de dos barcos fluviales compiten pol control del tresporte de mercancíes pel ríu Mississippi. Un d’ellos espera la llegada del so fíu universitariu Willie (Buster Keaton), pa que lu ayude nel negociu. Pero Willie ye un mozu torpe y inespertu y amás namórase de la fía del rival del so pá, lo qu’apina les tensiones ente los dos propietarios.

PEQUEÑA MISS SUNSHINE – 13 d’agostu, 22h CP García Lorca

Atarraquitaos nuna esgonciada furgoneta Volkswagen, la familia Hoover acompaña a la so fía pequeña Olive, que suaña con ser una reina de la guapura, al concursu de “Pequeña Miss Sunshine” nun traxicómicu periplu de trés díes llenu d’inesperaes sorpreses

LA VIDA DE BRIAN – 14 d’agostu, 22h CP García Lorca

Brian naz nun preselbe de Belén el mesmu día que Xesucristo. Un cúmulu de tracamundios fadrán-y llevar una vida paralela a la del verdaderu mesíes. Les sos poques lluces y l’ambiente de decadencia y caos absolutu en que s’haya somorguiada la Galilea d’aquellos díes, fadrán-y vivir la so propia versión del calvariu.

Categories: Cine