El FICX (Festival Internacional de Cine de Xixón) abre les inscripciones pa la 58 edición con novedaes nes sos competiciones oficiales.

Como principal novedá, la Sección Oficial del Festival va acoyer en 2020 una triple competición internacional de llargumetraxes:



Selección Oficial – Retueyos ye una nueva estaya a concursu dientro del FICX, que va recoyer una selección de filmes empobinaos por cineastes que s’atopen entá dando los primeros pasos na so filmografía: Primeres, segundes o terceres películes a concursu nuna sección que va sirvir para reforzar el componente d’apueste pol cine nuevu que caracteriza al FICX dende va años.

Selección Oficial – Albar  va ser la sección a concursu del 58 FICX que va recoyer una selección de filmes empobinaos por cineastes con una trayectoria consagrada y un sólidu percorríu per festivales internacionales a los sos llombos.

Selección Oficial – Tierres en trance. Ye una evidencia que dende va yá dellos años dalgunes de les propuestes más aventureres (¿sofisticaes?) y rupturistes dientro del cine d’autor contemporaneu vienen de filmes producíos nos distintos países d’Iberoamérica, asina, el FICX abre una sección a concursu puramente para filmes d’esti espectru (esto ye, Brasil, Arxentina, Colombia, Venezuela, Chile, Ecuador, Perú, Paraguai, Bolivia, Uruguai, Cuba, Costa Rica, Guatemala, El Salvador, Hondures, Nicaragua, Puertu Ricu, Panamá, República Dominicana, México, España y Portugal). El nome de la sección rinde homenaxe a un de los grandes renovadores del cine llatinu y fundador del Cinema Novo nos años 60, el brasileñu Glauber Rocha.

Ta previstu qu’esta edición del FICX se celebre del 20 al 28 de payares de forma presencial, siempres que se cumplan les condiciones sanitaries para ello y siguiendo escrupulosamente los protocolos de seguridá vixentes. Les inscripciones pa participar na 58ª edición del Festival Internacional de Cine de Xixón tán abiertes dende’l día 8 de Xunetu.

Categories: Cine