Tres la suspensión temporal del programa añal de proyecciones (FICXPlus) por causa de la situación d’emerxencia sanitaria xeneral, y como parte de la iniciativa Xixónquedaencasa del Conceyu de Xixón, el Festival Internacional de Cine de Xixón va ufiertar a los sos siguidores, al traviés de la iniciativa StreamFICX, una serie de programes audiovisuales online, d’accesu gratuitu, que se van dir anovando pasu ente pasu nes próximes selmanes, y que van ser accesibles dende la nueva web municipal www.gijonsequedaencasa.es, y al traviés de la web del FICX:

fic.gijon.es/page/19937-streamficx

Entama con una selección de 6 curtiumetraxes roblaos por directores clave del cine español contemporaneu y cuya trayectoria tuvo xunida al FICX :

/StreamFICX #1/

 

MI HERMANA Y YO /Virginia García del Pino, 2009, 10’/

Un documental sobro la buelga familiar, la infancia, l’amor y el refugu, a partir de la imaxe de dos hermanos adolescentes que protagonicen un viaxe premonitoriu escontra’l so interior, y que nos devuelve un presente crudo y desnudo del que participamos toos irremediablemente.

AY PENA /Elisa Cepedal, 2011, 19’/

Ruth Díaz (darréu nomada al Goya por Tarde para la ira) interpreta a una moza que vuelve al so pueblu asturianu natal dende l’estranxeru. Tien De resolver murnios y complicaos asuntos familiares desencadenaos tres la muerte de la so madre. Pero en pocos díes, o hores, yá se siente atrapada de nuevu…




LIPSTICK /Carla Simón, 2013, 9’/ V.O. Inglés sin subtitulos

Al traviés d’esti trabayu de cuartu trimestre de la London Filme School rodáu en 35mm y montáu por Álvaro Gago (Matria), Carla Simón (ganadora del Goya por Branu de 1993) entró per primer vegada en contactu cola dirección de neños. Una esperiencia que celebra la infancia y amuesa cómo los más pequeños s’enfrenten a l’ausencia d’un ser queríu.

LOS AÑOS DIRÁN /Andrea Jaurrieta, 2013, 16’/

España, 2012. Como munchos otros mozos de la so xeneración, Ana y Iván van mercar un pisu pela rodiada de la ciudá, inda en construcción. Lleven a los padres d’ella pa que dean el so postreru vistu bonu a la compra. A pesar de les ilusiones puestes nesta nueva etapa de les sos vides, Ana empieza a duldar sobro si esa ye la vida que realmente ella quier. Antes de ser nomada al Goya por Ana de día, Andrea Jaurrieta robló esti premiáu curtiumetraxe.



GURE HORMEK /Las chicas de Pasaik: Maider Fernandez & Maria Elorza, 2016, 15’/

El barriu de Les Ames de Casa. El distritu de Les Insomnes. El quioscu de La Madre Desconocida. El soterrañu de les Muyeres Soles. Les nueses parés («gure hormek» en euskera) homenaxen a quien queremos.

LES BONES NENES /Clara Roquet, 2016, 17’/

Los padres de Julia y Paula siempres criaron caballos. Les dos hermanes pasáronse la infancia xugando xuntes dientro del establu, pero l’adolescencia dinamitó la so relación. La violencia de la edá adulta ábrese pasu estrozando tolo qu’atopa nel so camín. Dirixe Clara Roquet, reputada guionista de películes como 10.000 Km. o Petra, ente otres.



Amás de los programes que van dir publicando col sellu StreamFICX, el Festival Internacional de Cine de Xixón tamién dispón de la so propia canal na plataforma de VoD autorizada FILMIN, media partner del Festival dende 2017. La canal ufierta una esbilla de más de 130 películes proxectaes n’ediciones anteriores del Festival y/o rellacionaes cola última edición del FICX: www.filmin.es/canal/festival-de-gijon




 

Categories: Mecigayu