Avilés Acción presenta un concursu de curtiumetraxes especialmente pensáu pa esta temporadina en casa.

“ConfinAcción Fest – cine de confinamientu” ye una convocatoria de curtiumetraxes para realizalos dende casa y va tar abierta hasta’l próximu martes 31 de marzu a media nueche, hora peninsular.

Tán convidaos a participar tolos mayores d’edá que quieran compartir la so esperiencia, moliciones y reflexones al rodiu de la situación actual de crisis del Covid-19.

El certame de curtiumetraxes avilesín presenta esta iniciativa pensada por que los cineastes compartan les sos moliciones y reflexones sobro’l periodu de confinamientu debíu al Covid19.

Cada participante va poder apurrir cuantes obres quieran, toes orixinales y inédites, nun podrán durar más de trés minutos, tienen que tar rodaes en castellán o asturianu y cuntar con subtítulos. El formatu va ser llibre, según la temática, anque se va valorar qu’ésta parta de la premisa reflexiva sobro la situación actual.


El concursu va cuntar con dos premios: el Premiu del Públicu, que se va apurrir al curtiumetraxe más votáu na rede y que va cuntar con una dote de 300€, y el Premiu del Xuráu, que se va apurrir al curtiumetraxe escoyíu pol xuráu escoyíu y que tamién va cuntar con una dote de 300€.

L’oxetivu principal d’esta iniciativa ye convertir l’aislamientu n’oportunidá, amás de recordar una vegada más la importancia del arte polo xeneral, y el cine en particular, pa dar sentíu a la realidá.

Los que quieran inscribise pueden faelo al traviés de www.avilesaccion.com



Categories: Cine