La nueva edición del Gijón Sound Festival yá tien fecha de celebración. El festival xixonés va tener llugar los díes 17, 18 y 19 d’abril. Esti alcuentru cultural, entamáu por Divertia Xixón y producíu por Mestizu Producciones, cumple asina la so octava edición y caltien el so espíritu de faer ciudá y de promocionar Xixón más allá de les sos fronteres. GijónSound caltien el patrociniu de Vibra Mahou, que sofita a artistes de distintes corrientes musicales xenerando asina esperiencies úniques al arrimalos al públicu con conciertos especiales.

James Rhodes, Redd Kross, Erlend Øye & La Comitiva, Alain Johannes, Bobkat’65, Lorena Álvarez, Los Saxos del Averno, Tito Ramírez, Diego Vasallo, Primas Hermanas y Festinfante presenta Queenmanía son los primeros artistes confirmados

GijonSound ye un añu más una cuidada y selecta apueste musical llocal, nacional y internacional . A falta de más artistes por confirmar, destaca’l regresu de James Rhodes, cuya so primer actuación n’España tuvo llugar precisamente nel GijónSound Festival en 2016. Nesta ocasión, el músicu británicu va llegar para celebrar el 250 aniversariu de la nacencia de Beethoven.

Redd Kross, Diego Vasallo o Lorena Álvarez van pisar los escenarios del GijónSound Festival 2020 para presentar oficialmente los sos nuevos trabayos. Súmense Alain Johannes, Bobkat’65, Los Saxos del Averno, Tito Ramírez, Primas Hermanes y Erlend Øye & La Comitiva, grupu fundáu pol alma mater de Kings of Convenience.

Per otra parte, esti festival sigue apostando por averar la música en directu a neños y neñes, cola actuación de Festinfante, que nesta ocasión presenten el show Queenmanía.


En pallabres de la organización, GijónSound Festival 2020 anueva les sos actividaes complementaries alternatives, col enfotu de ufiertar a ciudadanía y visitantes una esperiencia global de vivir en Xixón. Como novedá, el surf va tener una presencia destacada nel festival al traviés de charres temátiques, cursos y bautismos empobinaos a toles persones que quieran averase a esti deporte tan enraigonáu na ciudá.

La edición d’anguaño tamién va apostar pola sostenibilidá, un retu al que la mayoría de los eventos culturales s’enfrente y una seña d’identidá que siempres caracterizó al GijónSound Festival. Va collaborar con decenes d’entidaes, como otros festivales, asociaciones, escueles, hoteles, restoranes y organizaciones non gubernamentales, qu’añeden conteníu y ufierta a la esperiencia de GijónSound Festival.

Yá tán a la venta los bonos* (40 €) y les entrades por conciertos en: www.gijonsoundfestival.com (El abono nun inclúi los conciertos cellebrados na Universidá llaboral; Col bonu tendrase un 50% de dtu. nel Teatru Xovellanos)



Categories: Música