Esti vienres 28 de febreru, con motivu del 125 aniversariu del fallecimientu de Xuan María Acebal (1815-1895), destacada figura de la lliteratura en llingua asturiana, celebraráse n’Uviéu un pequeñu homenaxe a la so figura.

A les 18 hores , nel cementeriu de San Salvador d’Uviéu, delles persones venceyaes a la cultura van aldericar sobre la importancia del llegáu cultural d’Acebal.  A les 20h, na Taberna El Molín, na cai del Águila (Uviéu) habrá un recital poéticu na so memoria.

Xuan María Acebal (Uviéu, 8 de marzu de 1815 – 11 de febreru de 1895) ye una de les figures más importantes de la poesía asturiana del sieglu XIX, amás d’importante miembru del Partíu Carlista.



Queriendo facer carrera eclesiástica en Madrid, entamando estudios de Llatín, Humanidaes y Filosofía colos xesuites de San Isidro, tuvo que tornar p’Asturies después de dellos conflictos políticos ente los que’l Gobiernu espulsara a tolos relixosos d’esa orde nel 1835.

De vuelta n’Uviéu cambia la sotana polos oficios industriales, primero na fundición, depués nun fornu de pan, una mina, una imprenta…

Xenru del xefe políticu carlista Guillermo Estrada, comparte con él militancia tradicionalista, teniendo que dir al esiliu en Bayona dellos años.

Na so faceta de poeta, Acebal tien influencies de los clásicos llatinos, como Virxilio y Horacio. Sicasí, la producción lliteraria ye pequeña y apaez namás qu’en parte, na prensa rexonal. Si bien ye consideráu “Príncipe de los poetes en bable” pol so rigor llingüísticu y altor lliterariu. Non foi hasta l’añu 1925 cuando la so obra se recoyó en llibru de manes d’ Enrique García Rendueles, qu’inxerta en Los nuevos bablistas seis poemes y dos traducciones d’Horacio.

Nel añu 1995, la Selmana de les Lletres Asturianes dedícase al so nome, espublizándose la so obra poética completa.


Categories: Lliteratura