El filme documental El Cobayu, de Pablo Casanueva,ta siendo presentáu al traviés del formatu web-serie.

Van ser un total de siete episodios estrenándose cada domingu na canal de Facebook de “El Cobayu”, entamando’l domingu 22d’avientu.

244 families llegaron a El Cobayu (Ribeseya) en 1968. Pal cincuenta aniversariu realizóse un filme documental homónimu  col oxetivu d’amosar en primer mano’l testimoniu de les sos vecines y vecinos. Son un total de 70 les persones que narren el pasu de vivir n’aldea a vivir na villa. Voces y imaxes de El Cobayu entemécense para definir qué significó vivir y pertenecer a un barriu.

La web serie trata d’averar esos testimonios a nuevos espectadores. Sobre manera, al públicu nuevu. Una xeneración bien alloñada de les maneres de vida que se cunten nel documental.

El primer día que llegaron al barriu les families, l’estáu de les viviendes, les primeres anécdotes, los sentimientos de comunidá… una gran escoyeta d’hestories y sensaciones sobro una dómina, bien distinta, bien cercana y irrepetible.


Pablo Casanueva retrata nesti filme’l barriu de los sos güelos dende un puntu de vista social. Alloñáu d’una mirada personal y íntima como ficiere en  La sele construcción de la memoria o Escontra la casualidá, usa’l testimoniu y les narratives de los vecinos pa escuchar la hestoria. Yá nun ye él el que cunta’l pasáu sinón la xente la que lo cunten a él.

Con un apueste formal bien austera basada nun fondu blancu, qu’enfrente al espectador cola persona y la voz qu’escucha, y en más de 200 fotografíes feches polos vecinos. El barriu, los edificios, los xardinos, la plaza… apenes pué trate nel documental. Lo que crea un barriu son les persones y por eso tienen tol protagonismu a lo llargo d’esti filme documental.






Categories: Cine