Malpenes queden dos selmanes pa qu’arranque una nueva edición del Festival Internacional de Cine de Xixón, que como tolos años inunda de bon cine les sales.

Vamos repasar les principales novedaes d’esta nueva edición del Ficx:

El Cartel

Nuevamente César Sánchez ye l’encargáu de traenos la propuesta de cartelu oficial. Claramente inspiráu na película Blade Runner, de Ridley Scott.  “Siempres fui un gran amante del cine de ciencia ficción y, más concretamente, d’esta película de Ridley Scott. Cuando va unos meses enteréme de la muerte de Rutger Hauer, pensé que yera’l momentu perfectu para rindir el mio homenaxe a esti filme. Amás, a esto añadíase que la película se ambientaba, precisamente, nel mes nel que’l Festival de Xixón tien llugar. L’últimu factor qu’intervieno nesti procesu fueron les mios ganes d’añedir l’agua como parte d’unu de los mios diseños para’l FICX. Darréu pensé nel monólogu final de Roy Batty, a la fin namá se trataba d’ordenar toes estes idees sobro un papel”.

Enfants Terribles

La vinculación del Festival Internacional de Cine de Xixón coles audiencies más nueves del Séptimu Arte ye un fechu dende la mesma xénesis del mesmu como certame dedicáu a la infancia y a la mocedá, allá por 1963, de la mano de Isaac del Rivero. Para siguir cumpliendo con esi nexu col so fundador, nació la sección Enfants Terribles que cumple, nesti 2019, el so vigesimosegunda edición, en llevando, l’añu pasáu, a más de 15.000 espectadores a les sales onde se proxectaben dalgunes de les sos obres.

Esta edición de 2019 va presentar dellos trabayos cinematográficos que fueron estrenaos en festivales de too el mundu, siendo equí en Xixón onde van tener el so premiere nacional. Ente esos certames de prestíu internacional cúntense los de Sundance, Annecy, Berlín, Bonos Aires (BAFICI), Cannes, Locarno, o Toronto, onde consiguieron diversos premios y reconocencies. La selección recueye trabayos d’animación, tanto aquellos destinaos a los más pequenos como los que s’averen a esti estilu narrativu con un mayor grau de madurez, obres apegaes a la realidá nes que s’espresen diverses problemátiques y temes d’actualidá y interés pal públicu adolescente, ficciones qu’amuesen desafíos de la sociedá contemporanea na Europa de los nuesos díes; y tamién productos dificiles de clasificar, especialmente escoyíos pa los nuevos espectadores más inquietos, p’aquellos que busquen narratives alternatives al modelu audiovisual dominante.

Equí puedes lleer con detenimiento tola programación d’esta sección.




 

Rellumes

Na 57ª Edición del Festival Internacional de Cine de Xixón, la Competición Internacional Rellumes va ser más moza que nunca. Cumpliendo la so tradición de sirvir como puerta d’entrada a cineastes emerxentes, esta sección va traer nada menos que dolce primeros o segundos llargumetraxes de los sos autores, d’un total de catorce películes a concursu. La selección reflexa asina l’enorme puxu de les nueves voces del cine europeo y mundial y la decidida personalidá d’esta competición, que yá ye un clásicu, dientro de toles que componen el FICX.

El cine español va ser ún de los grandes protagonistes d’esti espaciu, al cuntar con cinco películes a concursu, que van vivir el so premiere absoluta nel 57FICX. Los nueve llargos restantes van ser, de la mesma, estrenos n’España. A ellos tenemos de añedir el mediometraje Electric Swan, de Konstantina Kotzamani, y el curtiumetraxe Sumir, del realizador asturianu Diego Llorente, para completar una selección inconformista y renovadora, tantu no referente a nomes como no tocante a formes d’espresión y nueves narratives.

Los premios de la Competición Internacional Rellumes van ser concedíos por un xuráu de la Federación Internacional de la Prensa Cinematográfica (FIPRESCI). El xuráu FIPRESCI d’esta edición ta compuestu por Bettina Hirsch, analista cinematográfica en Screen Magazin y editora xefe en Monday Movie Talk de la berlinesa Alexradio; Thierry Verhoeven, críticu de cine holandés en medios como Schokkend Nieuws o Frameland; y José Luis Losa, fundador y director del Festival Cineuropa Santiago de Compostela y cronista de cine nel diariu La voz de Galicia.

Afaya equí tou Rellumes

Sección Oficial

La Sección Oficial de llargumetraxes del Festival Internacional de Cine de Xixón va cuntar con clásicos modernos, ficción y non ficción, comedia, drama, traxicomedia, (autu) biografíes, cine políticu y hasta con una road movie (a pie) y va acoyer a cineastes de reconocíu prestíu xunto con nueves voces destinaes a ser protagonistes del audiovisual internacional nes próximes décades.

La Sección Oficial del 57 Festival Internacional de Cine de Xixón enllena la so selección con una llista de títulos que dan fe de la multiplicidá de voces, estilos y temátiques presentes na cinematografía actual. Una bien rica polifonía de miraes que nos trai lo meyor del cine internacional, que nos fala d’un Séptimu Arte qu’atopa les sos víes d’espardimientu al traviés del drama, de les narraciones coming of age, del cine de xéneru, de les pieces de denuncia social, de les obres de non ficción o de l’animación artesanal.

Equí vas atopar tolos detalles de la sección oficial

Axelle Ropert

El Festival Internacional de Cine de Xixón va siguir averando a los espectadores el cine d’autores cuyes obres, hasta’l momentu, permanecieren inédites nes sales comerciales del nuesu país. Nesti sentíu, mientres el próximu mes de payares, la cineasta francesa Axelle Ropert, una de les nueves voces más destacaes del cine francés contemporaneu va ser homenaxada na nuesa ciudá, gracies a un focu que va repasar la so obra hasta’l presente.

Axelle Ropert (París, 1972) empezó la so carrera como crítica de cine en medios tan prestixosos como La lettre de cinéma y Les inrockuptibles, dos de les revistes más destacaes nel analís cinematográficu del país vecín. El so trabayu tiró darréu escontra’l guion y l’actuación, campos nos que trabayó en delles ocasiones col so collaborador habitual y compañeru, Serge Bozon, destacando en filmes como La France (2007) ganadora del Premiu Jean Vigo y participante na Sección Oficial del FICX 2007.

Amás, realizadores tan relevantes y tamién vieyos conocíos del FICX como Eugène Green o Paul Vecchiali cuntaron cola so presencia en Le pont deas arts y C’est l’amour respectivamente. Una carrera interpretativa que demuestra, a última hora, la polivalencia de l’artista parisina.

Sicasí, va ser nel terrén de la dirección onde’l focu del FICX va faer fincapié. Ropert va llegar a Xixón presentando trés llargumetraxes inéditos nes sales d’exhibición españoles:  The Wolberg Family (2009), Miss and the Doctors (2013), The Apple of my Eye (2016).

Dichos llargumetraxes van ser presentaos pola mesma directora, que va tar presente en Xixón para comentalos col públicu del FICX en distintos alcuentros.


David Lynch

La Fundación Municipal de Cultura, Educación y Universidá Popular de Xixón y el Festival Internacional de Cine de Xixón (FICX) van acompañar la esposición David Lynch, Small Stories cola proyección de The Short Films of David Lynch, una colección de curtiumetraxes rodaos pol xenial artista estadounidense, que brinden una perspectiva más amplia de la so personalísimo universu. Esta colección de curtios ta compuesta poles siguiente obres: Six Men Getting Sick (1966) primer pieza audiovisual de la so carrera, The Alphabet (1968), The Grandmother (1970), The Amputee (1974) y Lumière & Compagnie: Premonitions Following an Evil Dead (1995).

Per otra parte, y yá fuera del espaciu del CCAI, les espectadores del FICX tamién van poder asistir al pase especial de Cabeza borradora (Eraserhead, 1977) no que va suponer l’estrenu n’España de la so copia restaurada en 4K. Esti llargumetraxe de Lynch, que foi la película favorita de Stanley Kubrick, contien munches de les idees que desenvolvería darréu nos diversos campos artísticos que cultivó, y supon una oportunidá incomparable para establecer un primer contactu con una de les personalidaes más singulares del nuesu tiempu. Una ceador incomparable, a última hora, que foi reconocíu col Oscar Honoríficu que-y foi apurríu estos díes na ciudá de Los Ánxeles.


Categories: Cine