La V Selmana del Audiovisual Contemporaneu d’Uviéu (SACO) va convertise nel puntu d’alcuentru de distintes espresiones artístiques, del 8 al 17 de marzu.

El festival, que ta entamáu pola Fundación Municipal de Cultura d’Uviéu, va estrenar un suxerente programa qu’inclúi cuatro premières na so sección laMESTA: El gabinete del doctor Caligari musicáu por Cabinet Quartet; l’espectáculu Improvisión III – Sala d’Espera; l’audiodrama L’home de SACO y l’amagu d’ hOZ, y la instalación El soníu del arte.

A estes propuestes hai que sumar tamién la yá anunciada versión d’El magu d’Oz cola B.S.O. al cargu de la Uviéu Filarmonía, l’estrenu n’España de Crossroads, d’Hackedepicciotto y la presentación n’Asturies de Keatoniana, de Jordi Sabaté.



SACO va siguir teniendo la so sede central nel Teatru Filarmónica, anque volverá llevar dellos espectáculos al Campoamor. La Selmana tamién va ufiertar la so actividá nel Muséu de Belles Artes, l’Edificiu Históricu de la Universidá, la Escuela Municipal de Música, el Ridea, el Colexu d’Abogaos, el Parking El Carboneru y la Biblioteca d’Asturies. Per toos estos sitios van pasar les nueve propuestes de laMESTA; 71 películes distribuyíes na Cartelera SACO y en cinco programes de curtios; un cursu sobro ciencia ficción, un taller de soníu, dos alcuentros (ún d’ellos col premiáu sonidista asturianu Pelayo Gutiérrez), dos esposiciones, una instalación, la grabación de programar Trés na carretera (Radio 3) y El cine que vien (Radio 5), y una visita guiada pel Muséu de Belles Artes d’Asturies. Una programación entretexida alredor de la vanguardia audiovisual y de les propuestes artístiques más suxerentes.

El Ridea va acoyer l’actividá VR Inmersión na realidá virtual, una propuesta pa tolos públicos cola que l’espectador va poder metese nel corazón de les películes programaes. Y nel Belles Artes podrá visitase El soníu del arte, instalación na que los sonidistas Óscar d’Ávila y José Tomé van poner soníos a seis obres que tán colgaes nel muséu, pieces de Zurbarán, Sorolla, Picasso, l’Equipu Crónica, Pérez Villamil y Fierros.



La carta blanca d’esta edición ye para’l festival Porto/Post/Doc, que va presentar un programa doble de la direutora Leonor Teles (Terra Franca, la rempuesta portuguesa a Munchos fíos, un monu y un castiellu). El públicu d’Uviéu va poder caltener un alcuentru con direutores como Xacio Bañu (Trote), Rocío Morato (Les cases que nos queden) y Samuel Alarcón, que va faer triplete: va presentar la so película Escuru y lucientes, va realizar una visita guiada pelos Goyas del Belles Artes y va grabar na Universidá’l so programa El cine que vien.

SACO apueste decididamente pol cine esperimental. La sección La invitación al viaxe va enfocar los trabayos de pioneros  como Jonas Mekas, Marie Menkel y Joyce Wieland. Van Ser dos sesiones proyectaes en formatu de 16 mm.

La programación de curtiumetraxes inclúi’l programa Recortos, que va amosar trabayos de seis realizadores españoles, y la selección de LABO del Festival Internacional de Clermont-Ferrand, apuestes orixinales de Francia, Suecia, Alemaña y Estaos Xuníos. Esta sesión va completase cola esposición Anatomie du Labo, testimoniu gráficu del diálogu que s’instaura ente los artistes y los curtiumetraxes d’esta competición. Del certame francés lleguen tamién  los programes infantiles de laSema, la sección más nueva de SACO.

Na sesión CURTAS, SACO súmase a la celebración de los 20 años de l’Agência da Curta Metragem con una selección de títulos aclamaos en festivales internacionales como’l del cineasta de cultu Eugène Green.

Les entraes para la V edición de SACO son de baldre y podrán retirase nes taquilles de los teatros Campoamor y Filarmónica, y na web http://entradas.oviedo.es/. Les entraes son numberaes y namás se van poner retirar dos invitaciones per persona.

Tola información d’horarios, sinopsis y actividades paraleles vais poder topales na web oficial del festival: http://www.semanasaco.net



Categories: Cine