Zaragoza va acoyer los díes 10 y 11 de febreru’l Segundu Alcuentru d’Academies de Cine d’España y Portugal, entamáu pola Academia del Cine Aragonés (ACA) y patrocináu pola Dirección Xeneral de Cultura y Patrimoniu del Gobiernu d’Aragón, nel que diversos representantes del sector van aldericar sobro’l presente y el futuru del oficiu.

Tarán presentes nesti Alcuentru les siguientes entidaes:

  • Academia de las Artes y la Ciencias Cinematográficas de España
  • Academia Portuguesa das Artes e Ciências Cinematográficas
  • Academia del Cine Aragonés
  •  Acadèmia del Cinema Català
  • Academia del Cine y de las Artes Audiovisuales de Andalucía
  • Academia Galega do Audiovisual
  •  Academia del Cine Asturiano
  •  Academia del audiovisual de Valencia

El domingu día 10 va tener llugar la recepción de los representantes , y la xornada va rematar con un cóctel de bienvenida al que tamién van asistir diverses personalidaes del mundu del audiovisual aragonés.

A esti alcuentru acudirán en representación de la xunta directiva de l’ Academia del Cine Asturiano la vicepresidenta, Marisa Vallejo y Graciela Mier.

El llunes día 11 va empezar con un almuerzu na terraza del IAACC Pablo Serrano, al qu’acudirán el Direutor Xeneral de Cultura y Patrimoniu del Gobiernu d’Aragón, Ignacio Escuín, la Xefa de Serviciu de Fomentu de les Artes, la Cultura y el Llibru, Anabel Gutiérrez, el Direutor Xerente d’Aragón Turismu, Jorge Marqueta, lo mesmo que dellos representantes de la Corporación de Radiu y Televisión d’Aragón y de medios de comunicación, periodistes y asociaciones de productores.

De siguío, va tener llugar la inauguración de la esposición “Galardones de les Academies de Cine d’España y Portugal”.

D’últimes va celebrase l’actu principal, una mesa redonda na que van participar tolos representantes de les Academies de cine, col siguiente orde del día:

  • Presentación de les nueves Academies: l’Academia del Cine Asturiano y l’Academia del Audiovisual de Valencia.
  • Redacción d’un conveniu de cooperación ente Academies, alcordáu nel Primer Alcuentru celebráu n’A Coruña, n’avientu de 2017.
  • El por qué y el pa qué de la esistencia de les Academies.
  • Canales de financiamientu de les Academies.
  • Estratexes de futuru. Adecuación del sector a les nueves tendencies de consumu cinematográficu. Les nueves plataformes audiovisuales. Futuru de la producción cinematográfica.
  • Proyectos de mancomún ya intercambiu de proyectos.
  • Alcuerdu de fecha y llugar del Tercer Alcuentru d’Academies.
  • Conclusiones finales y ellaboración de nota de prensa para los medios.

 

Categories: Cine