ESCENASTURIAS convoca la décima edición de los Premios Oh! de les Artes Escéniques d’Asturies, que reconocen añalmente’l talentu de los profesionales de los escenarios asturianos. L’actu d’entrega va tener llugar nel Teatru Xovellanos de Xixón el vienres 1 de febreru de 2019, a les 20:30 hores. Esta edición ye la primera entamada por ESCENASTURIAS, tres la unión d’ACPTA y ForoEscena, les dos asociaciones profesionales que yá l’añu pasáu entamaron conxuntamente la entrega de los gallardones.

Los Oh! tienen doce categoríes, once d’elles a concursu: Meyor Espectáculu, Meyor Espectáculu para la Reciella, Meyor Dirección, Meyor

Intérprete Masculín de Teatru o Danza, Meyor Intérprete Femenina de Teatru o Danza, Meyor Autoría o Coreografía, Meyor Producción, Meyor Composición Orixinal o Espaciu Sonoru, Meyor Escenografía o Espaciu Escénicu, Meyor Indumentaria o Carauterización y Meyor Diseñu de Lluz. El galardón fuera de competición, el Premiu Oh! d’Honor, va ser otorgáu pola asamblea d’ESCENASTURIAS a la persona o entidá que destaque pola so relevancia o trayectoria profesional.

El vieja de Covaletti – Higiénico Papel

Nestos gallardones van poder participar les empreses productores o compañíes profesionales de danza y teatru d’Asturies y tolos espectáculos tendrán de ser represetaos n’Asturies y estrenaos ente’l 1 de setiembre de 2017 y el 31 d’ochobre de 2018.

El plazu de recepción de candidatures yá entamó va díes y fina’l próximu 20 de payares de 2018. Puedes descargar el formulariu d’inscripción equí.

Un xuráu formáu por cinco persones rellacionaes col ámbitu de les artes escéniques va ser l’encargáu d’escoyer a los meyores del añu.




Les cifras de los Premios Oh!

Dende la so primer edición, en 2010, los Premios Oh! recibieron 1.150 candidatures de 139 d’espectáculos de 41 compañíes de teatru y danza. Les compañíes más premiaes nestes ocho ediciones fueron Teatro del Cuervo, Factoría Norte e Higiénico Papel.

Teatro del Cuervo – Carne de Gallina

Los espectáculos premiaos dende la primer edición fueron los siguientes: Crecer (El Callejón del Gato), Vientos del mar (Higiénico Papel Teatro), Carne de gallina (Teatro del Cuervo), En un lugar de la galaxia (Teatro del Cuervo), Mariana Pineda (Teatro del Norte), El viaje de Covaletti (Higiénico Papel), Después de cortar el césped (Zigzag Danza), Nora (Factoría Norte), Folías (Factoría Norte), Un lugar en tu corazón (Teatro del Cuervo y José Luis Lago Producciones), Doctor Fausto (Higiénico Papel Teatro), Cuento del día y de la noche (Producciones Quiquilimón), Almaelectra (Factoría Norte), Una casa (Higiénico Papel), Elektra (Teatro del Norte), El sueño de una noche de verano (Teatro del Cuervo), Como ceniza blanca sobre una hoguera (La Tejedora de Sueños) y El viaje de Dorothy (Fantastique Company).




 

Categories: Mecigayu