La música va ser la protagonista de Radio 3 presenta…, un nuevu ciclu del #56FICX que, en collaboración cola cadena más anovadora de RNE, inclúi cuatro documentales musicales escoyíos por periodistes de la emisora pública, nun claru apueste pol xéneru, qu’ufren una peculiar visión sobro’l jazz, el heavy metal, el rock y el flamencu.

Les películes van ser presentaes por nomes esenciales de Radio 3: Javier Tolentino, cronista cinematográficu y director del programa El séptimo vicio; Benitu Pinilla, coordinador de conteníos d’El séptimo vicio; José Manuel Sebastián, subdireutor de Los conciertos de Radio 3 y integrante del equipu Hoy empieza todo (con Marta Echevarría), y Carlos Galilea, fundador y director de Cuando los elefantes sueñan con la música.

Radio 3 presenta…:

Michel Petrucciani (Michael Radford, 2011). El músicu francés Petrucciani llogró, magar la so grave enfermedá ósea, convertise nun enorme pianista de jazz, y inclusive tocar con dalgún de los sos ídolos. Radford plantega nesti documental una hestoria de superación, la d’un pequeñu gran home que, paeciendo tenelo too en contra, llogró algamar les sos metes en demasía. La película va ser presentada por Carlos Galilea.



Anvil! The story of Anvil (Sacha Gervasi, 2008). Anvil ye’l nome d’un grupu de heavy metal fundáu en Canadá en 1978. Magar ser almiraos por munchos célebres nomes del oficiu, nunca consiguieron algamar un ésitu masivu, sicasí, eso nun los torgó caltenese n’activu toos estos años. El documental, que llogró más de venti premios en festivales internacionales, recupera la hestoria de tan escaecíu grupu y avérase a l’actual cotidianeidad de dos de los sos miembros: el guitarrista Steve Lips Kudlow y la batería Robb Reiner. La película va ser presentada por José Manuel Sebastián.

Gimme Danger (Jim Jarmusch, 2016). El director estadounidense atrevese con esti repasu pela hestoria d’unes de les bandes de rock más sobresalientes de tolos tiempos, The Stooges. Un documental que tardó ocho años en terminase, desque en 2008 fuera’l mesmu Iggy Pop quien-y propunxera a Jarmush la realización d’esti filme. “Esti documental ye la declaración d’amor a la disidencia, a non claudicar ente artistes, bandes y discográfiques corruptes que remanen la industria dando’l llombu a la música y a la llibertá”, sorraya Javier Tolentino, quien va ser l’encargáu de presentar esta película.

Omega (José Sánchez-Montes, Gervasio Iglesias, 2016). La poesía de Lorca, les notes descarnaes de Leonard Cohen, el sangre flamenco y les guitarres lléctriques combináronse maxistralmente nel discu Omega, publicáu pol maestru Enrique Morente y el grupu granadín Lagartija Nick, en 1996, un discu que revolucionaría’l flamencu. L’homónimu documental narra cómo se parió un álbum que la crítica de cualquier xéneru reconoz como un finxu na música española. Va Ser presentada por Benito Pinilla.



Categories: Cine Música