La 21 edición d’Enfants Terribles va ufiertar al públicu más mozu del FICX catorce producciones internacionales, trés d’elles fuera de competición, alloñaes de la hexemonía de Hollywood pa esfrutar nes sales y repensar nes aules.

Una amuesa del cine para neños y adolescentes que se ta faciendo en países como Francia, Reinu Uníu, Alemaña, Islandia, Estonia o Canadá, y que se va ver equí en premier estatal. Una cuidada selección fecha a midida de los auténticos protagonistes d’esta estaya, continuadora del espíritu orixinal del Festival Internacional de Cine de Xixón y una de les sos marques d’identidá.

El programa infantil y xuvenil del Festival ye un eventu imprescindible pa la comunidá educativa d’Asturies dende va dos décades, como lo demuestren los más 200.000 estudiantes que pasaron peles sales d’Enfants Terribles.

Esta sección ye una parada casi obligatoria nel calendariu d’actividaes de los centros educativos asturianos, y tamién de Castiella y Llión, Galicia y Cantabria, que motiva a los educadores a faer usu de les proyecciones p’aldericar en clase temes actuales como la multiculturalidá, la esclusión social, la educación sexual o’l desenvolvimientu personal.

La selección va esibir once películes a concursu, y va incluyir trés títulos fuera de competición

Pela competición d’Enfants Terribles van pasar títulos que fueron presentaos, y en dellos casos premiaos, en festivales como Cannes, Berlín, Toronto, Slamdance o Giffoni.

Maestros de l’animación como Michel Ocelot, ganador d’Enfants Terribles en 1999 con Kirikú y la bruxa, van volver a Xixón cola so última película, Dilili á Paris. Tamién torna al FICX la prestixosa cineasta Claire Simón, cola so semeya xeneracional Premières solitudes, presentada na Berlinale y tamién incluyía na Competición Internacional Rellumes; Llinda Hambäck, bien aplaudida en Berlín con Gordon & Paddy, o Árni Ásgeirsson, que dirixe la superproducción Ploey – You Never Fly Alone.

Amás de les óperes primes de Meryem Benm’Barek, Pascal Plante o Ed Lilly. Coles mesmes, va poder esfrutase The Breadwinner, nominada al Oscar y al Globu d’Oru y producida por Angelina Jolie. El cine español va tar presente cola coproducción hispanu-dominicana Miriam miente, de Natalia Cabral y Oriol Estrada, premiada en Karlovy Vary, y que va tener el so estrenu estatal na sección Esbilla del FICX.

El cartel

Cartel Enfants Terribles 2018

El cartel d’Enfants Terribles ye obra de César Sánchez, autor de la imaxe de les caberes ediciones.

La competición

Sofia, de Meryem Benm’Barek (Francia/Qatar). La ópera prima d’esta direutora marroquí algamó’l premiu al meyor guión na última edición d’Un Certain Regard, en Cannes. Pal so primer llargumetraxe, quitó’l velu que cubre una tema delicada nel so país: la maternidá fuera del matrimoniu. La película va participar simultáneamente na sección Esbilla del 56 FICX.

 

Fake Tattoos, de Pascal Plante (Canadá). Escoyida en certames de prestíu como Berlín, Slamdance, Edimburgo o Bonos Aires, la primer película de ficción d’esti escritor canadiense ye una conmovedora hestoria d’amor ente un introvertíu punk y un espíritu llibre.

 

We The Coyotes, de Hanna Ladoul y Marco La Via (Francia/Estaos Xunios), presentada en Cannes y que cunta les 24 primeres hores de la nueva vida d’una pareya moza en Los Ánxeles con planes mediu fechos y bolsos mediu vacíos.

 

Gordon & Paddy, de Linda Hambäck (Suecia). Presentada en Berlín y Toronto, ta basada nun clásicu de la lliteratura infantil sueca. Les voces de Stellan Skarsgard (Los vengadores) y Melinda Kinnaman (Bron) acompáñennos nesta emocionante hestoria de detectives protagonizada por animales prestosísimos.

 

Ploey – You Never Fly Alone, de Árni Ásgeirsson (Islanda/Bélxica). Esta azogosa aventura d’altos vuelos na llínea de PIXAR y Dreamworks yá se vio en más de 20 países. El protagonista ye un pitucu de chorlito aparentemente pocu duechu que se les tien qu’inxeniar para superar les sos medranes y salir alantre por sí mesmu.

 

Premières solitudes, de Claire Simon (Francia). Esta direutora de referencia del cine francés contemporaneu torna al FICX (compitió na Sección Oficial en 2006) con una certeru retratu de los adolescentes d’un institutu de la periferia parisina. La película tamién va tomar parte na Competición Internacional Rellumes.

 

Un corazón extraordinario, de Marc Rothemund (Alemaña). El direutor de la ganadora del Oscar Sophie Scholl: Los últimos díes, xunta a un bon vivant trentañeru con un adolescente que tien una seria dolencia cardiaca pa filmar una hestoria sobre’l sentíu de la responsabilidá.

 

Les rois mongols, de Luc Picard (Canadá). Esta adaptación d’una novela de Nicole Bélanger, ufierta una visión lúcida de los neños nel mundu de los adultos: cuatro primos tomen un rehén pa reclamar el so derechu a escoyer el so futuru, inspirándose nos actos terroristes del Frente de Lliberación de Quebec.

 

Captain Morten and The Spider Queen, de Kaspar Jancis, Henry Nicholson y Riho Unt (Estonia/Irlanda/Gran Bretaña/Bélxica). Filme fechu nel estudiu d’animación en stop-motion más antiguu del mundu, en Tallin, y inspiráu en La metamorfosis de Kafka, llanza un mensaxe a favor de permanecer fiel a los suaños a pesar de quien quier quitátelos.

 

VS., d’Ed Lilly (Gran Bretaña). Esti realizador mozu foi señaláu pola BBC como un de los nuevos talentos británicos, y nos trai un drama sobre un adolescente adoptáu que se taramiella nel borde de l’autodestrucción y qu’atopa la so voz propia nel mundu del rap británicu.

 

Miriam miente, de Natalia Cabral y Oriol Estrada. (República Dominica/España). Coproducción sobre la tradicional celebración de los 15 años que tien llugar nel país caribeñu, que mereció una mención del xuráu en Karlovy Vary. Crónica íntima de l’adolescencia dominicana, entreverada por una feroz crítica a una sociedá na qu’entá añeren el clasismu y el racismu.

 

Fuera de competición:

Dilili à Paris, de Michel Ocelot (Francia). La nueva ayalga animada del direutor de Kirikú y la bruxa llévanos al París de la Belle Époque pa siguir a una xovencísima detective qu’investiga los raptos de moces na Ciudá de la Lluz. Película tan cautivadora que The Hollywood Reporter describe como “un misteriu cultural maraviyosu”.

 

Old Boys, de Toby MacDonald (Gran Bretaña/Suecia). El direutor del premiáu curtiu Je t’aime John Wayne, debuta nel llargumetraxe con una revisión del clásicu Cyrano de Bergerac, ambientada nuna escuela, onde un estrañu pero imaxinativu estudiante ayuda al héroe de la clase, daqué tontu, a consiguir averase a la fía d’un profesor visitante de francés.

 

The Breadwinner, de Nora Twomey (Canadá). Producida por Angelina Jolie. Con esta película sobre una neña que se fai pasar por neñu nel Afganistán baxu control Talibán, la direutora llogró la so segunda nominación al Oscar a la meyor película d’animación, y foi tamién candidata a los Globos d’Oru.

 

Categories: Cine