El INCUNA Festival Internacional de Cine sobre Patrimoniu Industrial y Paisaxes Culturales INCUNA va abrir la so primer edición el próximu xueves cola película Ciudaes a contralluz, de Francesc Relea, en Llaboral Cinemateca (20:00 hores).

L’actu d’inauguración va ser presentáu pola periodista asturiana Graciela Oliveira y será de baldre hasta completar aforu. Sicasí pa poder asistir habrá qu’acutar invitación al traviés del mail: información@incunafilmfest.com.

Del 20 al 23 de setiembre, el certame va poner el focu en películes que reflexonen y actuen sobre’l patrimoniu industrial material y inmaterial y los paisaxes culturales, nes trés sedes d’esta edición: Llaboral Cinemateca (Xixón), Cine Felgueroso (Llangréu) y Casa de la Cultura d’Avilés.

 

Del 20 al 23 de setiembre, el certame va poner el focu en películes que reflexonen y actuen sobre’l patrimoniu industrial material y inmaterial y los paisaxes culturales, nes trés sedes d’esta edición: Llaboral Cinemateca (Xixón), Cine Felgueroso (Llangréu) y Casa de la Cultura d’Avilés.

Ciudaes a contralluz ye una película documental que cartografía l’alma de cuatro ciudaes cuyu nome remembra destrucción y sufrimientu na década de los 90. Kigali, Saraxevo, Beirut y Mediellín amuesen anguaño una tresformación na estructura, la planificación urbana, el tresporte públicu… Pero eso ye namás un reflexu del so espíritu. La ciudá ta formada por cais, places y barrios, pero entá ye más por persones. Sicasí munches d’estes persones son exemplu de llucha, de diálogu, de conciliación y d’optimismu.

Dibuxar el mapa d’estes cuatro ciudaes ye trazar un manual d’instrucciones ente l’adversidá. Toes elles padecieron conflictos que provocaron foles de refuxaos y desplazaos, que reflexen en distinta midida los grandes desafíos del sieglu XXI.

El direutor del filme, Francesc Relea foi corresponsal d’El País sucesivamente n’América del Sur, México y Centroamérica y Portugal, ente los años 1998 y 2011. Cubrió pal mesmu diariu la guerra na antigua Yugoslavia ente 1992 y 1995.

Enantes, formó parte del equipu fundacional del programa 30 Minuts, de Televisió de Catalunya – TV3, como reporteru en distintos puntos d’África, Oriente Próximu y América Llatina Empecipió la so carrera profesional n’El Periódicu de Cataluña.

La sección Found Footage va ofrecer en Xixón los filmes The Bomb y Built to Last – Relics of Communist-Era Architecture

Amás de la sección oficial a concursu, INCUNA IFF va ufiertar el ciclu Found Footage en Llaboral Cinemateca, que presenta una pequeña sección de películes realizaes fundamentalmente a partir de materiales ayenos, de fragmentos de películes publicitaries, industriales y promocionales, entendiendo qu’estos materiales tamién son parte del patrimoniu industrial y cultural, y que retraten munches vegaes la dómina na que fueron xeneraes. Inclusive se da la circunstancia que’l tiempu da-yos nuevos significaos, dacuando inclusive contrarios a les sos intenciones orixinales. A ello hai que-yos sumar el llabor artísticu de los cineastes que, sirviéndose d’estos materiales, remonten, funden, alterien y combinen para crear un nuevu discursu y esperimentar con nueves formes y rellaciones.

Esti ciclu convida, por tanto, a formular otra reflexón sobro estes películes, los sos materiales y los temes que proponen, dende’l puntu de vista del patrimoniu, la hestoria, la política y el paisaxe.

THE BOMB (Kevin Ford, Smriti Keshari, Eric Schlosser, EE.XX, 2016) Na interseición del arte, la política y la tecnoloxía, esta película analiza l’inmensu poder de les armes nucleares, l’atractivu perversu qu’exercen y el fondu deséu de muerte nel corazón mesmu d’elles. La película de 55 minutos introduz al espectador na realidá estraña, convincente y esmolecedora de les armes nucleares de güei.

BUILT TO LAST – RELICS OF COMMUNIST-ERA ARCHITECTURE (Haruna Honcoop, República Checa, 2017). Documental qu’esplora’l destín de los grandes edificios y monumentos d’estilu soviéticu alzaos mientres la era comunista (1945-89) en países d’Europa Central y Oriental. Esta serie de diez curtiumetraxes esamina los cambeos munches vegaes dramáticos nes actitúes públiques escontra estes reliquies del nuesu pasáu recién. Esti filme recibió’l Premiu al Meyor Documental en Archfilm Lund Festival (Suecia).

El xuráu de la sección oficial ta formáu pol direutor de cine José Antonio Quirós, el profesor y arquitectu Fernando Vela Cossío y Celia Martínez García, fundadora y CEO de www.berlinfilm.es

Pa esta primer edición del INCUNA, la competición va tar formada por cuatro llargumetraxes y una docena de curtios que podrán vese en siete sesiones partíes ente Xixón, Avilés y Llangréu. Van Competir películes de cinematografíes tan distintes como Lituania, Taiwan, Brasil o Canadá. El 75 % de les películes del concursu son de factura europea. En cuanto al xéneru, la selección inclúi cine esperimental, documental y cine musical.

Sección oficial

  • LABORATORIO (Fernando José Pereira, Portugal, 2018). Estrenu mundial.
  • RETURBIU. LA GÜERIA SAN JUAN (Manuel García Postigo, España, 2018). Estrenumundial.
  • BÉTON BORÉAL (Mathieu Quirion, Canadá, 2018). Estrenu mundial.
  • LA VIE DE TUNNEL (Baptiste Aubert, Suiza, 2017). Estrenu internacional.
  • THE MILL (Patrick McGinley, Daniel Allen, Estonia, 2018). Estrenu internacional.
  • LIEBIG (Christian Ercolano, Argentina, 2016). Estrenu en Europa.
  • L’OR DANS LES CENDRES (Magali Roucaut, Francia, 2018). Estrenu n’Europa.
  • DEMI-VIE À FUKUSHIMA (Francesca Scalisi, Mark Olexa, Francia/Suiza, 2016). Estrenu n’España.
  • CINEMA ZONE (Cheng Li-Ming, Taiwan, 2018). Estrenu n’España.
  • MON PATRIMOINE TU T’ANIMES À THIERS? FILM DE CRÉATION #1 (Lisa Robert, Clotilde Amprimoz, Francia, 2017). Estrenu n’España..
  • TIME SUBJECTIVES IN OBJECTIVE TIME (Kati Kallio, Finlandia/Rusia, 2017). Estrenu n’España..
  • REMEMBER, THOU ART CLAY (David Heinemann, Elvina Nevardauskaite, Lituania/Reino Unido, 2016). Estrenu n’España..
  • CONSTRUINDO PONTES (Heloisa Passos, Brasil, 2017). Estrenu n’España..
  • THE CITY OF THE SUN (Rati Oneli, Georgia/EE.UU/Qatar/Países Bajos, 2017).
  • MATRIA (Álvaro Gago, España, 2017).
  • NOTOWN (Emmanuelle Bayart, Timo Kirez, Suiza, 2016).

La entrada a toles sesiones y actividaes de la primer edición del INCUNA IFF ye llibre. Para inscribise nes conferencies y talleres, hai qu’unviar un corréu a  informacion@incunafilmfest.com

 

Categories: Cine