Edición Nobel convoca’l XXV Premiu Internacional d’Ensayu Jovellanos y el VI Premiu Internacional de Poesía Xovellanos, El meyor poema del mundu

Edición Nobel anuncia la convocatoria de la 25 y la sesta edición de los prestixosos Premios Internacionales d’Ensayu y de Poesía Xovellanos, dos gallardones, dotaos con 9.000 y 2.000 euros respeutivamente, que reconocen creaciones orixinales lo mesmo nel campu del pensamientu, les humanidaes, les ciencies sociales y la naturaleza, como nel de les composiciones llíriques. Dambos premios tán dirixíos a autores de tol mundu con obra escrita en cualquier llingua y la so convocatoria queda abierta hasta’l próximu 6 de xineru de 2019.

XXV Premiu Internacional d’Ensayu Xovellanos

La 25 edición del PREMIO INTERNACIONAL DE ENSAYO JOVELLANOS busca una vegada más estremar creaciones orixinales y inédites que supongan una aportación relevante nos campos del pensamientu, les humanidaes, les ciencies sociales y de la naturaleza, escrites por autores de cualesquier país del mundu. El gallardón, que tien periodicidá añal, foi instituyíu en 1994, al cumplise’l 250 aniversariu de la nacencia de Gaspar Melchor de Xovellanos.

El Premiu Internacional d’Ensayu Xovellanos tien por finalidá dar a conocer propuestes orixinales y reflexones fondes qu’estimulen l’apertura de nuevos caminos na permanente llucha del ser humanu por enanchar los horizontes de la so conocencia y por topar respuestes a los numberosos problemes y interrogantes que trescalen a la sociedá d’anguaño.

La obra ganadora va ser publicada en conociéndose’l fallu del xuráu, col enfotu d’apurrir asina al sector del llibru y al panorama cultural español un productu editorial de contrastada calidá. La concesión d’esti gallardón trai una dotación económica de 9.000 euros.

El postreru ganador del Premiu Internacional d’Ensayu Xovellanos foi l’exrector de la Universidá del País Vascu y catedráticu d’Hestoria Contemporánea Manuel Montero con El sueño de la libertad. Mosaico vasco de los años del terror.

VI Premiu Internacional de Poesía Xovellanos, El meyor poema del mundu

El Premiu Internacional de Poesía Xovellanos, El meyor poema del mundu, busca un añu más la suxestiva utopía d’atopar “el meyor poema del mundu” para recordar al pernomáu Gaspar Melchor de Xovellanos, rindir homenaxe al so autor y “espublizalo por tolos medios pa que la voz de les y los poetes allume los díes en que la nueche non dexe paso a la lluz, pa que les sos pallabres sían una antorcha na tierra escura”. La dotación del premiu ye de 2.000 euros.

Pa poder participar, toles candidatures tendrán de rexistráse na páxina web  http://poesia.premiojovellanos.com dientro de la estaya ‘Inscripción’.

El ganador de la última convocatoria foi’l poeta asturianu Alejandro Garmón pola so composición Alejandría.

Categories: Lliteratura