L’apueste musical de Mahou n’Asturies sigue col patrociniu de los conciertos que se van celebrar nel Espaciu Mahou de la plaza del Ayuntamientu de Xixón a lo llargo d’esta edición del Gijón Sound Festival. Pel escenariu van pasar esti vienres los murcianos Viva Suecia tres la yá asturiana Fee Reega y el sábadu va ser la vez de la burgalesa Maraviyosa Orquesta del Alcohol..

VIVA SUECIA (Viva Suecia, 2014. Ep; La fuerza mayor, 2015. Subterfuge; Otros principios fundamentales, 2017. Subterfuge) . A lo llargo de los dos últimos años vienen asitiándose como’l grupu Indie del momentu. Peten los cartelos de los festivales en cualesquier puntu de la xeografía estatal, apaecen en toles llistes de lo meyor del añu, meyor discu, meyor cantar, meyor direutu, de más rápida ascensión… tando a piques de llegar al centenar de conciertos. Coláronse nel décimu puestu de la llista oficial de ventes onde permanecieron 10 selmanes. Amás, recibieron el Premiu de la música independiente a Meyor Cantar por “Bien por ti” y tuvieron nominaos a Meyor Artista Español nos MTV European Music Awards.

Esti principiu d’añu tráennos la reedición del so segundu discu “Otros Principios Fundamentales” con dos temes nuevos y tan cada vez más al frente del relevu xeneracional de les nueves bandes qu’acopen la escena estatal.

FEE REEGA va encargase de dir caleciendo l’ambiente. La bien conocida cantante y compositora de la banda postpunk «Captains» y del grupu alemán de folkrock sicodélicu «Dead Hands», y posteriormente poeta de Purpurina y percebes,  va llegar al Escenariu Mahou presentando’l so últimu discu “Sonambulancias”, que yá cumplió l’añín de vida y nel que los temes xiren al rodiu del actu de durmir les nueches.

El sábadu será’l turnu de la M.O.D.A. (No Easy Road (2011); The Shape Of Folk To Come/No Easy Road (2012); ¿Quién nos va a salvar? (2013); La Primavera del Invierno (2015); Salvavida (de las balas perdidas) (2017)) . La Maravillosa Orquesta del Alcohol combina preseos como acordión, saxofón, banyo, mandolina o clarinete con influencies del folk, country, punk y rock and roll, dando llugar a un mecigayu que tien el so puntu fuerte nel direutu.

Na so intensa trayectoria, La M.O.D.A foi ganándose una base sólida de siguidores gracies a la pasión, honestidá y carretera. A sos llombos, un puñáu d’ep’s, dos discos d’estudiu y unu en direutu, amás de considerables xires, actuaciones nos principales festivales y presentaciones en Dublín, Llondres, México, Francia o Italia.

LA MODA

Tres un añu de reposu, el septetu remanez con un nuevu LP tituláu ‘Salvavida (de les bales perdíes)’, trabayu autoeditáu nel que la banda dibuxa nuevos horizontes musicales ensin perder la identidá que, según crítica y públicu, llevó-yos a faese un mereciu nome nel panorama de la música de los nuevos tiempos

Categories: Música