Fame Poétika vien semando poesía y sacando autores del anonimatu dende l’añu 2013. Cada timba  entemez música y llectura de poemes y rellatos curtios, micru abiertu pala collaboración, la inspiración y la ellaboración.

Nesta edición de Gijón Sound Festival que ta a piques d’arrancar, Fame Poétika entama una timba nel Salón d’Actos del Antiguu Institutu Xovellanos el sábadu  14 d’abril magar les 20:00 hores, qu’amás, va tar completada pola música de los morciniegos “Gente Terrible”, que vienen a presentar el so recién estrenáu EP “Gracias por su visita”

L’otru día comentaben unos neños d’un institutu de Xixón que taben preparando un reportaxe pal periódicu escolar que yá nun había poetes. A pesar de la mocedá en Fame Poétika, ¿Notáis un saltu xeneracional ehí,  na llende ente la mocedá que ta n’edá de tar nel institutu y los que yá tais fuera?

Ún de los oxetivos más nidios de Fame ye l’averamientu de la poesía en distintos ámbitos y tolo que seya nun llegar a dalgún grupu concretu ye daqué a meyorar y tener en cuenta. Nesi sen, por mediación de profesores tenemos feches timbes poétiques n’institutos y colexos, y pa los siguientes meses tenemos yá pesllaos otros eventos y recitales qu’esperemos sirvan pa esparder la poesía ente los más mozos.

La collaboración col GSF va abrivos un nuevu espectru de xente a la que llegar cola poesía. ¿Qué mires tenéis?

Cada timba ye una oportunidá p’abrir espacios, indistintamente del sitiu. Evidentemente’l GSF ye un día mui bonu y dexa a les clares que la poesía cola nuesa propuesta ye daqué qu’interesa y funciona. La primer mira de Fame Poétika ye la de pásalo bien, por eso creo nun dexamos de medrar y de llenar en tolos sitios onde vamos: tenemos muncha suerte.

Como bien dicís, Fame Poétika vien medarando a pasos axigantaos dende l’entamu gracies a algamasteis l’interés d’esa xente que teníen escondíos los sos versos. ¿Cómo ye la primer vez que dalguien s’apunta a la llista pa lleer nuna timba?

Suelen tar nerviosos ya emocionaos, ye daqué no que lleven pensando tola selmana, daqué mui importante. Y nós tratamos de curiar eso, que pierdan el mieu pero que nun se pierda la frescura ya autenticidá de cuando entames por presión. La verdá que ye dalgo mui prestoso y la xente repite: asina que ye bona señal.

xeneramos una forma d’humanizar una sociedá que cree que nun tien tiempu pa sintir a los demás

¿Cuála ye la fuercia de la Poesía pa construyir o facer d’ésta una sociedá más culta?

Nun sé si contribuimos a facer una sociedá más culta. Lo que sí que creo qu’algamamos ye que la xente se siente un sábadu a sintir les voces d’otres persones, a cuntar y a respetar lo qu’otros cunten, independientemente de quien seya. Lo que xeneramos ye empatía, comprensión, ye una forma d’humanizar una sociedá que cree que nun tien tiempu pa sintir a los demás. Y facelo al traviés de la poesía ye a que la xente se siente interesante

Más lliteratura nel GSF

Amás, el Gijón Sound Festival va ufiertar esi mesmu día cola  participación de les llibreríes La Buena LetraLibrería 4 Letras y La Revoltosa una “feria del llibru” nel Patiu del Antiguu Institutu Xovellanos.

Y paralelamente entama, en collaboración con OTEALiteralia y Ramón Bilbao. El 1er Certame lliterariu Gijón Sound Festival.

Los participantes habrán escribir un micro-rellatu de non más de 280 calteres de temática musical y/o la gastronomía. Los rellatos van apurrise nes trés llibreríes enriba mentaes ente’l 5 y el 12 d’abril  y van ser los responsables d’éstes quien decidan quién va ser el ganador. El premiu va anunciase y va dase’l sábadu 14 a partir de les 20 hores nel Centru Cultural Antiguu Institutu y va consistir nuna botella de vinu Ramón Bilbao, edición llindada Ara Malikian y un vale valoráu en 100€ para gastar n’establecimientos collaboradores. Puedes consultar equí les bases

Categories: Lliteratura Música