Danos la sensación que pa la xente qu’entá nun vos conoz, el vermú del día 14 d’abril con L-R va ser una de les coses que se-yos va quedar na memoria d’esti GSF . ¿Cómo van eses ganes d’enseñase nesti conciertu?

La verdá ye que naguamos por dar esti conciertu. Llevamos dellos meses paraos y esti ye’l primer conciertu de la temporada. Ye una oportunidá única pa nos, por tocar nun escenariu tan interesante como’l de Gijón Sound Festival y con xente a la qu’admiramos como son dellos de los grupos que van tocar nel festival. Tamién ye una oportunidá pa la xente ayeno a la música y baille tradicional asturiano d’averase a la cultura del país.

L-R ye’l resulta d’entender la música tradicional asturiana como dalgo vivo y en movimientu asemeyando a la sociedá de la que ñaz.

Dos añinos intensos con esti proyectu que supón un antes y un depués nes vueses trayectories artístiques. Emulando a Siniestro total…  ¿Quiénes sois, d’ú venís, ónde vais?

Llevamos munchos años trabayando  cola música y el baille tradicional asturiano, Leticia en grupos de recuperación etnográfica y, sobre too, tocando la pandereta pal baille, y Rubén reellaborando la música tradicional en grupos folk. Dende fai unos años a Leticia dio-y por  reformular l’imaxe clásica de la “panderetera”, tratando d’averar l’instrumentu a un contestu actual pero calteniendo los ritmos tradicionales. D’esta forma y por accidente nació L-R, a ú la tradición asturiana de voz y pandereta améstase con otres tradiciones y soníos más actuales que vienen cola guitarra llétrica y la teunoloxía.  L-R ye’l resulta d’entender la música tradicional asturiana como dalgo vivo y en movimientu asemeyando a la sociedá de la que ñaz.

El volver a casa y nun topar los instrumentos…  ¿se paralizó’l mundu aquella tarde del robu?

El robu foi una esperiencia terrible, nun solo porque entren na to casa frayando  la intimidá d’ún, sinón por que marchen con un cachín de to vida, como son los instrumentos d’un músicu. Nun lleven sólo una ferramienta, lleven un cachu de ti.

Semeya: Laura Rodríguez

Mamáis direutamente de la tradición. ¿Veremos pronto composiciones (lletra y música) vuestres dafechu?

Ye una cuestión que tenemos pendiente y na que tamos trabayando de cara al discu que tamos preparando. Igual pal día 14 estrenamos daqué…

Enmárcasevos dientro d’una nueva fola de modernidá y tresformación na música trad asturiana xunto con por exemplu Antón Menchaca y Un de Grau,  ¿Echáis en falta que se faigan más coses nueves nel campu del que venís?

Tando como tan les coses, con que se faigan coses bien feches, con ciñu y honestidá yá nos conformamos. Si vemos la producción discográfica o los grupos o xente n’activu nel circuitu de la música tradicional ye un poco deprimente polo poco que se fai. Échase en falta xente nuevo. Sicasí, tamién hai coses positives, como la plataforma musicasturiana.com

L-R ye música pa baillar. ¿Tien cabida a muñeira de Degaña na play-list de los chigres modernos?

¿Por qué non?

Semeya: Laura Rodríguez

¿Cómo evoluciona la música trad fuera d’Asturies? ¿cuál ye’l recibimientu de L-R al otru llau del Cantábricu, nos ”países celtes”?

A la contra de lo que pasa na propia Asturies paez que la música asturiana ta de moda. Esta seronda pasada tuvimos nun festival en Dingle (Irlanda) y sorprendiónos munchísimo como la xente nun solo conocía coses d’Asturies sinón que nes jam sessions conocíen temes pa tocar con nos. Aparte d’eso abondos músicos “celtes” tan grabando temes asturianos ya interésense pola cultura d’equí.

En cuanto a L-R yá tenemos ganes de salir a tocar fuera d’Asturies. De momentu tenemos unos conciertos en Leeds (Inglaterra) en xunetu, nel festival Underneath the Stars (underthestarsfest.co.uk) nel que vamos compartir cartel con xente como Kate Rusby o Steve Earle. Pa xineru de 2019 tenemos feches pesllaes pa una xira por Bretaña (Francia) y tamos negociando coses en Córcega. Agora mesmo tamos entamando a grabar el nuestru primer discu y naguamos por terminalu y poder presentalu pel mundiu alantre.

* [ Semeyes:Laura Rodríguez http://laurarodriguezfoto.com/ ]
Categories: Música