La cuarta Selmana del Audiovisual Contemporaneu d’Uviéu (SACO) sigue creciendo y programa pa esta edición un total de 65 títulos onde s’entemez el  cine d’autor más suxerente y xoyes del cine clásico y esperimental. El certame arranca’l próximu 16 de marzu cola película palestina Wajib.

 

Nesta edición, el certame afonda nel diálogu ente’l cine y el restu de les artes con trés estrenos absolutos: Fasenuova sobro Maya Deren, l’audiodrama Home gordu con sacu y Óliver Punk: l’audiovisual, amás de celebrar el 60 aniversariu del estrenu de Vértigo, d’Alfred Hitchcock cola interpretación en direutu de la B.S.O. al cargu d’Uviéu Filarmonía.

La programación cinematográfica inclúi 19 llargumetraxes y 46 curtios

SACO va siguir teniendo la so sede central nel Teatru Filarmónica, anque volverá llevar dellos espectáculos al Campoamor, Muséu de Belles Artes, l’Edificiu Históricu de la Universidá d’Uviéu, la Escuela Municipal de Música, el Ridea, el Colexu d’Abogaos, el Parking El Carboneru y la Fábrica d’Armes de la Vega. Por toos estos sitios van pasar 19 llargumetraxes, cinco programes de curtíos con 46 títulos, un cursu, un taller, dos masterclass, seis espectáculos, una esposición, una instalación, la grabación del programa radiofónicu Tres en la carretera (Radio 3) y una visita al Muséu de Belles Artes d’Asturies col direutor Sergio G. Sánchez.  Una programación entretexida alredor de la vanguardia audiovisual y de les propuestes más suxerentes tanto cinematográfiques como artístiques.

Na programación atopamos títulos que trunfaron en festivales como Cannes, Berlín, Sundance, Toronto, Sitges y Karlovy Vary, ente otros.

Títulos avalaos pola crítica como Comunión, d’Anna Zamecka, quien va tar n’Uviéu presentando la so película, escoyida meyor documental nos últimos Premios del Cine Européu. SACO programa tamién la francesa Petit Paysan, d’Hubert Charuel, que la pasada fin de selmana algamó trés César de l’Academia francesa; la película vasca Handia, de Jon Garaño y Aitor Arregia, ganadora de 10 Goyas , tres la cual, l’actor Joseba Usabiaga y el productor Xabier  Berzosa van caltener un alcuentru col públicu nel Filarmónica. Tamién va visitar Uviéu Michal Marczak, meyor direutor en Sundance pol documental Toes eses nueches ensin dormir.

Manuel Martín Cuenca va presentar una sesión 100% accesible d’El autor y va inaugurar la instalación La cara B, basada na so película Caníbal

El direutor Manuel Martín Cuenca va faer doblete en SACO4:  per un llau va presentar una sesión 100% accesible d’El autor nel Filarmónica. Per primer vegada, la historia, protagonizada pol asturianu Javier Gutiérrez (Goya al Meyor Actor) podrá vese con sotítulos,  audiodescripción y llingua de signos. El direutor va tar n’Uviéu tamién pa inaugurar la instalación La cara B, basada na so película Caníbal, que va tar nel Ridea del 22 al 25 de marzu.

El certame va estrenar una sección dedicada al cine esperimental, va amosar curtios de los festivales de Clemont-Ferrand y Curtas Vila do Conde, y Porto/Post/Doc y Cinema Oh! Culto van programar dos sesiones

La carta blanca d’esta edición ye pal festival Porto/Post/Doc, que va presentar Tarrafal, de Pedro Nieves, quien va visitar SACO per primer vegada. Y en collaboración con Cinema Oh! Culto, va proyectase’l documental Con la pata quebrada, de Diego Galán. Nesta sesión especial van participar l’artista Paco Clavel y el documentalista del filme Juan Sánchez.

El públicu asturianu tamién va poder ver Matar a Dios, de Caye Cases y Albert Pintó, que va cuntar cola presencia del actor Eduardo Antuña; la direutora Arantxa Aguirre va presentar Dancing Beethoven; Muchos hijos, un mono y un castillo, de Gustavo Salmerón, Goya al Meyor Llargumetraxe Documental y una de les últimes revelaciones del cine español, y En cuerpo y alma, d’ Ildikó Enyedi, candidata a los Oscar a la película de fala non inglesa.

Los actores Joseba Usabiaga y Eduardo Antuña, los directores Arantxa Aguirre, Michal Marczak, Pedro Neves y Anna Zamecka y l’artista Paco Clavel serán dalgunos de los convidaos que visitarán SACO4

El cartelu de SACO4 complétase con Bienvenida a Montparnasse, de Léonor Serraille, Cámara d’Oru n’Un Certain Regard de Cannes; Félicité, d’Alain Gomis, gran premiu del xuráu en Berlín; El maraviyosu xardín secretu de Bella Brown, de Simon Aboud, y Eat That Question: Frank Zappa nes sos propies palabres, de Thorsten Schütte, premiada en San Sebastián.

Cinco programes de curtios

SACO estrena sección: La invitación al viaxe ufierta al públicu una introducción al cine  esperimental.  La Escuela Municipal de Música va ser la sede de les dos sesiones d’esti ciclu coordináu por Elena Duque qu’ufierta una cuidada selección de curtios esperimentales de pioneros como Marcel Duchamp, Germaine Dulac y Marie Menken.

El programa Recortos, coordináu na so sesta edición por Elena Duque, inclúi Rapa da bestas, de Jaione Camborda; Matria, d’Álvaro Gago; El becerro pintado, de David Pantaleón; La inútil, de Belén Funes; La muyer invisible, de Noemí Chantada, y El fareru de Sálvora, de Gloria Vilches. Un añu más, esta sesión va ser 100% accesible.

Los aficionaos al curtiumetraxe van tener la oportunidá de ver el programa de curtíos de la sección Labo del Festival de Clermont-Ferrand, apuestes orixinales de Francia, Bélxica,  Holanda, Polonia y Estaos Xuníos. Esta sesión va completase cola esposición Anatomie du Labo,  testimoniu gráficu del diálogu que s’instaura ente los artistes y los curtiumetraxes d’esta  competición. Les películes d’esta sesión constitúin la materia primo cola que trabayen los artistes convidaos a formar parte d’esta amuesa, na qu’esti añu participa Mónica de Juan en representación d’Asturies.

Del certame francés lleguen tamién los programes infantiles de laSema, la sección más moza de SACO.

La programación de curtios inclúi amás una selección de Curtas Vila do Conde (Portugal), qu’inclúi títulos que compitieron Cannes, como Coelho Mau, de Carlos Conceição, o Água Mole, d’ Alexandra Ramires y Laura Gonçalves.

Entrades

Les entrades pa les sesiones de cine de la cuarta edición de SACO son gratuites y podrán retirase nes taquilles de la Filarmónica, y na web http://entradas.oviedo.es/. Les entrades son numberaes y namá se van poner retirar dos invitaciones per persona.

Nel Teatru Filarmónica podrán retirase pa les sesiones del mesmu día, n’horariu de 12:00 a 13:30 hores, y de 16:00 hasta l’empiezu de la última sesión (pa les actividaes programaes nesi espaciu).

Les entraes pa los espectáculos programaos nel Teatru Campoamor podrán mercase n’horariu de 12:00 a 13:30 y de 16:00 a 20:00 hores y na web.

Podrá aplicase un 50% de descuentu en cada entrada pa estudiantes universitarios y de ciclos non universitarios; alumnos d’escueles de música y conservatorios; pensionistes, families numberoses, beneficiavos del carné xoven, grupos de más de  20 persones; persones con movilidá amenorgada y un acompañante y persones inscrites como demandante d’empléu.

Categories: Cine