Asoleyaba’l poeta Diego Solís un artículu nesta revista va unos díes nel que falaba de les sos impresiones na VII Xunta d’Escritores Asturianos y, de pasu, del estáu de la lliteratura asturiana d’anguaño. Quier ésta ser otra opinión más sobre esi panorama y contribuyir – como cuido que fai mui bien la de Diego – a esi alderique abiertu. Vaiga per delantre que nun ye ésti’l puntu de vista d’un espertu nin en llingua nin en lliteratura – soi politólogu – sinón como humilde narrador y llector n’asturianu y, en consecuencia, parte implicada na discusión al rodiu de pa ú ta empobinándose la lliteratura asturiana que vien anguaño.

Y sí, digo “que vien” y non “que vieno”, porque nun hai dulda dala de que’l vientu sopla con fuercia, les veles tan llargaes y el barcu avanza a tou meter p’hacia’l puertu d’una oficialidá al rodiu de la que yá hai un consensu xeneralizáu. Cuando pasa dalgo d’esta amplitú (y la oficialidá ta al cayer), ta claro que va ser un finxu perimportante  que va marcar un enantes y un dempués na historia del nuesu pequeñu país.

Tamos a piques d’entamar una nueva época na cultura y na lliteratura asturiana y coincido con Diego Solís en que ye’l momentu de facer una reflexón sobre delles coses que yo resumiría en trés entrugues básiques:

  1. ¿Qué papel pal escritor?
  2. ¿Qué rol ha tener “lo vieyo” (les obres, les temátiques, les formes y hasta les razones pa escribir) n’Asturies del mañana?
  3. ¿Qué esperamos de la lliteratura asturiana que ta pa venir?

La xente más mozo que ta asoleyando anguaño per primer vegada tuvo la suerte de nun vivir los “años de plomu” d’Areces. Una dómina nes que les torgues a la matriculación n’asturianu (tocóme nel Alfonso II), les denuncies y identificaciones policiales a los activistes de la llingua (tocáronme tamién) y los incumplimientos de sentencies xudiciales pa con Radio Sele foron la norma. Asina yera aquel tiempo, y como d’aquel tiempu soi fíu y entamé a escribir, como quien diz, embaxo les ales de la Pita de la Xunta, nun acabo de ver una escritura non-militante nin veo tampoco l’usu del castellán como una renuncia a la militancia.

Poro, respondiendo a la primer entruga “¿Qué papel pal escritor?” el mio apueste ye’l d’una lliteratura militante y relevante políticamente. L’escritor ye una figura que tien un impautu social que nun tienen otres: Si un escritor asturianu asoleya un llibru, entrevístalu la TPA y un garapiellu (variable en función de l’autoría y la temática) de medios y revistes. Naide nun entrevista a un médicu por atender una gripe nin a un científicu (con rarísimes esceiciones) cuando saca un “paper” nin, tampoco, a un dibuxante si fai un dibuxu. Los escritores han tener una responsabilidá social y política. La lliteratura pué entretener – yo defendo y defenderé siempre que la lliteratura tien que ser, perriba de too: ociu, entretenimientu y diversión y que si nun lo ye, nun ye bona lliteratura – pero amás d’esi entretenimientu la lliteratura o, polo menos los escritores, han treslladar un mensaxe comprometíu cola sociedá y col mundu.

 la lliteratura o, polo menos los escritores, han treslladar un mensaxe comprometíu cola sociedá y col mundu.

Harry Potter ye un cuentu infantil de magos y bruxes, sí, pero tamién un cuentu anti-racista onde los malos son los que llamen a los otros escolinos “sangre sucio”. Nun sé si faen falta escritores comprometíos “cola llingua” – cuido que sí – pero teo mui claro que sí faen falta escritores comprometíos col país y col mundu; porque si dalgo deprendimos nesta dómina ye que la política nun se fai namás nos parllamentos y nos gobiernos, sinón que fáenla tamién l’IBEX, la cai, les redes sociales, los hashtags y, cómo non, la lliteratura. Paezme en consecuencia irresponsable qu’un escritor guarde pa sigo mesmu, pa la so obra y pal so ego l’espaciu mediáticu que-y acuta la prensa y l’espaciu públicu que-y da la sociedá y nun lu emplegue tamién pa lluchar polo que cree que ye xusto. Asina que creo na escritura con responsabilidá social y, en consecuencia, con vinculación social pa cola llingua, el país y el mundu.

Pasando a la segunda entruga (y la más amplia de toes) “¿Qué rol ha tener lo vieyo?” Hai que dicir que ta abiertu un alderique al rodiu de si la lliteratura asturiana tien que llendase a beber namás de fontes mundiales y ha escaecer a los clásicos propios (por probes, escasos o malos) entamando de cero l’edificiu cultural o si, per contra, hai que reverenciar a los clásicos asturianos y basanos nellos garrándolos por exemplu de too. Responder a esta entruga nun ye cenciello porque nun hai una respuesta “blanco/prieto.

los clásicos lliterarios asturianos suelen tar toos descatalogaos y dir por ellos ye facer un verdaderu trabayu d’arqueoloxía dignu d’Indiana Jones.

En primer llugar habría que falar de l’accesu difícil a los clásicos que nun hai n’otres lliteratures: Los clásicos castellanos, catalanes o gallegos tán n’Amazon y nes más de les llibreríes, mientres que los asturianos suelen tar toos descatalogaos y dir por ellos ye facer un verdaderu trabayu d’arqueoloxía dignu d’Indiana Jones. L’ALLA tendría que los tener en PDF n’internet toos ellos en formatu descargable. Munchos tán, pero otros ye imposible atopalos. En segundu llugar, convién recordar que la nuesa ye una lliteratura d’una llingua minorizada y maltratada que convive nuna situación de precariedá cola castellana: ¿Cómo escaecer los clásicos asturianos cuando queremos escribir nuna llingua maltratada que pierde léxicu década a década? Ye imposible: Necesitámoslos como referencies. Anque necesitámoslos tamién non polo léxico o lo estrictamente lliterario, sinón pa tener conciencia social d’ú venimos y cuálos son los nuesos referentes sociales y les lluches de les que somos heriedes. En tercer llugar, ye la nuestra una llingua y una lliteratura pequeña y hai referentes que tenemos que dir a buscalos fuera: ¿Ú la ciencia ficción? ¿Ú la lliteratura fantástica? ¿Ú’l best seller? Nun tenemos nengún nin nos clásicos nin nel Surdimientu. Aínda tamos naguando por ellos y nun vamos a arrenunciar a esos xéneros (o nun deberíemos) polo que tamién necesitamos clásicos universales y beber d’otres lliteratures que sí tienen referentes nestes estayes.

Llévanos esto a acabar cola tercer entruga “¿Qué esperamos de la lliteratura asturiana que ta pa venir?”. Evidentemente, esto tien más de carta a los reis magos qu’otra cosa, pero podríemos sintetizalo en trés conceutos: Normalidá, entretenimientu y compromisu. Normalidá, porque la lliteratura asturiana precisa de xéneros qu’anguaño cuasi nun tien pa poder ser normal. Precisamos de ciencia ficción, d’historia-ficción, de lliteratura fantástica, de xuegos de rol tornaos al asturianu, de fan fiction, de noveles d’adolescentes hormonaos… En definitiva, de tolo que mos falta depués de 40 años de falar del Pueblu y de la Guerra Civil, que lleven siendo los monotemes de la nuesa lliteratura.

Nun podemos facer una lliteratura de salón pa falar ente entendíos, sinón comprometida cola sociedá

Una lliteratura que preste lleer, porque hai bien poques coses que preste lleer n’asturianu: ¿Por qué nun hai best sellers na nuesa llingua d’esos que tán tornaos a milenta idiomes y conocíos pel mundu enteru? ¿Cuántes noveles, poesíes, obres de teatru mos fixeron “pasalo bien” de verdá? ¿Por qué ta’l xéneru poéticu tan sobre-representáu nes nueses lletres si, en xeneral, el xéneru qu’entretién, el que presta más lleer ye la novela? Daqué tamos faciendo mal. ¿Quiciabes una lliteratura mui centrada nos premios y nos criterios de xuraos d’eruditos en cuenta de na xente que se supón que tien que lleenos? Y, n’últimu llugar: Compromisu. Porque como dicía na primer entruga, la lliteratura asturiana nun puede tar xebrada del so país, de la so realidá, de los sos problemes nin de la so hestoria. Nun podemos facer una lliteratura de salón pa falar ente entendíos, sinón comprometida cola sociedá. Y el día que la oficialidá y l’Arcadia Feliz aporten (Si ye que lleguen), nun escaezamos enxamás d’ú venimos, lo que fuimos, lo que cuasi dexamos de ser y la responsabilidá tan grande que tenemos, individual y coleutivamente, de caltener un bien cultural inmaterial d’orixe medieval como ye la llingua asturlleonesa.

Categories: Columnes Lliteratura