Gijón Sound Festival presenta los primeros nomes pa esti añu. El certame xixones afita’l so apueste na dinamización cultural de la ciudá, apostando por  nuevos campos d’actuación amosando , otru añu más,  la so intención de constituyise n’acelerador y hub cultural.

Pa la organización, los nuevos oxetivos céntrense en crear de Xixón una marca averada a la cultura, la movilidá y l’anovación, conceutos imprescindibles nes modernes ciudaes del sieglu XXI.

El programa y los conteníos d’esta edición que se va celebrar los díes 13, 14 y 15 d’abril va desvelándose pasín ente pasu y yá adelantren dalgunos de los platos fuertes d’esta edición:

Sleaford Mods, Maria Arnal i Marcel Bagés, Pablo Und Destruktion, La M.O.D.A y Bigott.

 Sleaford Mods: el dúu de Notthingham ye’l conxuntu musical que meyor ta sabiendo espresar les crudes emociones de la clas obrera. Dende’l Reinu Uníu y col post-punk como bandera, rap xenuinamente británicu.

Maria Arnal i Marcel Bagés: preséntense con un direutu consolidáu como una de les esperiencies más emotives, turbadores y emocionantes del nuesu presente musical  y con “45 cerebros y 1 corazón” (Fina Estampa, 2017) el meyor discu nacional del 2017 (Mondo Sonoro).

Pablo Und Destruktion: averáu al folk d’autor con una cadencia misteriosa y sicodélica, los sos cantares son ceremonies con vida propia, cantares íntimos cargaos de sensaciones y pesares qu’estáticos.

La M.O.D.A: con influencies del folk, country, punk y rock and roll, dando llugar a una propuesta única con un direutu espectacular y presentando nuevu LP tituláu ‘Salvavida (de les bales perdíes).

Bigott: Los sos direutos son esperiencies úniques, una esaltación. Enerxía contaxosa entre Bigott y el públicu.

Fiesta presentación Gijón Sound Festival 2018. Lee Bains III & The Glory Fires y The Real McCoyson

Va ser el sábadu 27 de xineru, na Sala Albéniz magar les 22:00 hores cuando’l grupu Lee Bains III & The Glory Fires procedente d’Alabama xuba al escenariu presentando’l so tercer discu “Youth Detention/// (Nail My Feet Down to the Southside of Town).

Van tar acompañaos de The Real McCoyson. Nel 2003 el so segundu discu “Let It Drill” (H-Records), tola crítica rindióse a la inmensa calidá de la banda asturiana.  El so mecigayu de garaxe, rhythm&blues y lo que-yos  venía en  gana fizo que ganaren un nome importante na escena estatal.


Artes Escéniques. Gijón Sound Festival col teatru

Esti añu en collaboración col Teatru Xovellanos GSF va ufiertar dos obres teatrales.

Cine/La Tristura. Vienres 13 d’abril a les 20:30 hores.

“Imaxinamos a un home mozu, que mientres años nun se decidió a entamar un viaxe. Quiciabes por mieu, quiciabes por incapacidá, quiciabes porque nunca atopó’l momentu…”

 Sedientos / Compañía Ferroviaria. Sábadu 14 d abril a les 20:30 hores.

“A Boon, un antropólogu forense, pídese-y investigar los restos d’un mozu que morrió fai 22 años, abrazáu a una moza, dambos d’identidá desconocida y atopaos no fondero d’un ríu conxeláu…”

Poesía: Timba de Fame Poétika

Xixón Sound Festival, tamién collabora con Fame Poetika, colectivu poéticu bien conocíu polos llectores de Vërtigu,  que lleva cuatro años  n’activu entamando eventos poéticos perdayuri.

Les sos timbes poétiques consisten en micro abiertu de poesía nel que cualesquiera pué recitar testos propios o ayenos. Bien sía apuntándose primeramente o direutamente ellí.

La Movilidá. Temática d’este añu en Gijón Sound Festival

La ciudadanía ta llamada a tener un papel creciente na xestión de les ciudaes porque esta ye más eficiente cuando se ponen en xuegu recursos non convencionales como la conciencia social, capacidá de xestión y cultura organizativa, creatividá, ayuda mutua, dedicación y compromisu de los beneficiarios. Si la comunidá nun s’implica, los proyectos nun funcionar, por munchos recursos financieros que se destinen.

“Dende Gijón Sound Festival queremos axuntar persones con interés y sensibilidá polos problemes de la ciudá como la movilidá, l’accesibilidá y el mediuambiente urbanu y tamos trabayando n’actividaes qu’ayuden a la concienciación d’una tema tan importante pa construyir un Xixón del sieglu XXI, de la mano de 30 Díes en bici y Ciclandia”.

Imaxe anovada

La quinta edición del Xixón Sound Festival yá ta caleciendo motores, y llega con una imaxe anovada. Nuevu llogu, nuevu eslogan y un cartelu dafechu distintu a los anteriores.

“Volvemos a dicir que’l centru d’esti festival ye Xixón, y eso ye precisamente lo que tresmite’l so nuevu eslogan:

“La ciudá como cabeza de cartelu”.

Esti conceutu ta presente en tolos elementos comunicativos d’esti añu. La protagonista absoluta del cartelu de la edición 2018 ye una nube d’elementos que nos tresmite lo meyor de la ciudá, el festival, les espresiones artístiques que se van dar ellí y la temática d’esta edición: la movilidá.

 

Categories: Mecigayu Música