El Gijón Sound Festival presenta la so programación pa la edición d’esti añu con una fiesta na Sala Albeniz de Xixón esti sábadu 27 de xineru de magar les 22h que va cuntar coles actuaciones de Lee Bains III & The Glory Fires y los asturianos The Real Mccoyson.

Les entrades yá se pueden mercar na propia web del festival ww.gijonsoundfestival.com y na Llibrería Paradiso por 8€ + gastos. Na taquilla van tar a 10€, sicasí, la entrada ye llibre pa toles persones que tengan l’abonu del Festival, que tamién se pué consiguir na web del Gijón Sound Festival.

LEE BAINS III & THE GLORY FIRES

El 8 d’avientu, Don Giovanni Records espublizó’l tercer álbum de llarga duración de Lee Bains III & The Glory Fires, “Youth Detention”.

Un LP doble de 17 cantares. El trabayu más ambiciosu de la banda hasta la fecha: un rexistru estensu y visceral dau tantu a la introspeición fonda como a la elevación espiritual de gran volume. Una música inspirada fondamente nel punk, pero tamién nel soul, power pop, country y gospel.

Grabáu en Nashville, Tennessee en Battletapes col inxenieru Jeremy Ferguson y el productor Tim Kerr, “Youth Detention” garra la banda en forma cruda. Los cantares tán fondamente enraigonaes na esperiencia de Bains de la so ciudá natal, Birmingham, Alabama. “Youth Detention” representa una ciudá sureña nes décades averaes al cambéu de mileniu. Sicasí, les lletres podríen sonar verdaderes en cualquier llugar. El Sur esiste nel mundu y, como’l Sur, el mundu ta cada vez más comprometíu con munches d’estes tensiones y fuercies.

La revista UNCUT comparó’l so trabayu apocayá colos meyores cantares épicos de Drive By Truckers Southern añadiendo: “Bains almite les influencies de bandes de Britsh como The Kinks, Jam y Blur, pero tamién roqueros universitarios de los 80 como The Primitons, Let’s Active y REM”.

THE REAL MACCOYSON

Cuando tolos enteradinos dicíen per enésima vegada na hestoria de la música recién: “el rock morrió”, los rapazos de The  Real Mccoyson, ayenos a esos discursos, víen como únicu futuru posible, ese bon y vieyu rock & roll pensando que la tradición taba a salvo.

Corría l’añu 1998 y The Real Mccoyson dedicábense a ganar tolos concursos  a los que se presentaben al empar que sacaben el so primer trabayu “The Real Mccoyson” (Astro Discos), que llogró inmeyorables crítiques y supunxo’l pasu pa dase a conocer al otru llau de les llendes asturianes y estatales, llamando l’atención de grandes de la industria como Mike Mariconda (Crypt record, Raunch Hands) que los bautizó como “la meyor banda de garaxe-rock d’europa y meyor que munches d’EEXX”.

Depués d’unos años caleyando la xeografía estatal conciertu a conciertu, tornaron, con Juan Martínez (Dr. Explosión) a los controles, pa grabar los sos nuevos doce cantares (una más na versión de vinilu). “Let it Drill” foi una prestosa sorpresa. El soníu cálidu y direutu fai xubir unos cantares llibres d’afectación y d’adornos superfluos. Un discu con una bayurosa variedá d’estilos que van dende’l r’n’b de Blue Manifesto  al pop sicodélicu de Cold Cold Feeling, pasando pol garaxe – punk de Muscle Hustle, o’l blues pantanosu de Work Even Harder. Depués llegaría Hot On My Trail que supondría la vuelta de la banda tres dellos años de retirada.

Categories: Música