cultivu, el: sust. Sustancia [afayadizo pa desarrollase microbios nun llaboratoriu]. Conxuntu [de microbios desarrollaos en llaboratoriu nuna sustancia afayadizo] (DALLA).

Les pieces incluyíes na amuesa CULTIVOS son frutu d’un procesu nel que la creadora asume, penriba de toes, la so identidá receptora: “La creación nun ye sinón l’actu de dar forma a lo que se recibió”, en palabres de John Berger. Hai daqué en quien crea de narrador estrañáu, suma de restes que nesti casu van dexando la tisoria, el cúter… Si hai ganancia na sema, va saber quien mira: mientres y non plural, la intimidá del nós…

La tercera propuesta de VitrinaDolsé llega de la mano de Carmen Santamarina, artista y diseñadora gráfica con una llarga trayectoria que se remonta a mediaos de los años ochenta y que nesta ocasión trabaya’l colax en pequeñu formatu, cola particularidá de que les pieces se circunscriben nun contenedor de cristal de los que davezu s’utilicen pa los cultivos nos llaboratorios. D’ehí’l títulu de l’amuesa: CULTIVOS. Tratase de 21 pieces coles que pretende siguise cola filosofía de VitrinaDolsé: amosar obres d’arte en soportes y n’espacios non habituales y con precios accesibles, y averar l’arte a la ciudadanía en xeneral, ensin que tengan qu’allegase a un muséu o sala d’esposiciones.

VitrinaDolsé ye un proyectu de Mónica de Juan.

La esposición de colaxs de Carmen Santamarina va poder visitase en Dolsé Antiques (c/ Mendizábal 4, Uviéu) del 7 d’avientu de 2017 al 5 de xineru de 2018

CARMEN SANTAMARINA

Desque a mediaos de los ochenta empezara a desenvolver la so faceta profesional como diseñadora gráfica (Santamarina Diseñadores), les sos ferramientes de trabayu tamién se convertieron en fieles ferramientes que-y vienen acompañando a lo llargo de toos estos años nun calláu procesu creativu: dende la imaxe, somorguiase na imaxe y tresformala. Asina, l’impulsu d’un quefer qu’aporta en poesía visual (en 2016 llogra xunto al poeta Hermes González el segundu accésit del IV Premiu “Francisco Pino” de poesía esperimental).

Categories: Plástica