Na Sección Oficial del 55 Festival Internacional de Cine de Xixón van estrenase a nivel estatal 17 llargumetraxes, cinco d’ellos óperes primes, o de realizadores tan respetaos como Paul Vecchiali, Eugène Green, Marc Recha, Ruth Mader, Arnaud Desplechin, Bruno Dumont, Petra Biondina Volpe, Abel Ferrara o Hong Sang-soo.

El futuro que viene (Constanza Novick – – Arxentina 2017). Primer llargumetraxe para la guionista y directora Constanza Novick para’l que cuntó cola presencia de dos de les actrices más populares d’Arxentina, Dolores Fonzi y Pilar Gamboa, y la producción de Lisandro Alonso. L’amistá de dos muyeres a lo llargo de los años ye analizada nesti filme que va tener el so première Europea na inauguración del 55FICX.

Destinos (Posoki, Stephan Komandarev – Bulgaria, Alemaña, Macedonia 2017). Tercer llargumetraxe del director búlgaru Stephan Komandarev. Un filme coral qu’usa, como nexu narrativu, la esperiencia nel día ente día de cinco taxistes de Sofía y que nos trai una visión pesimista sobro la Europa aparentemente bendecida coles ventayes del Estáu del Bienestar que nos tocó vivir. Presentada na sección Un Certain Regard del Festival de Cannes 2017.

Did You Wonder Who Fired the Gun? (Travis Wilkerson – Estaos Xuníos 2017). En 1946, el güelu del cineasta Travis Wilkerson mató a un ciudadanu afroamericano desarmáu nun remotu pueblu de Alabama. Setenta años más tarde, Wilkerson vuelve al Vieyu Sur pa desvelar esti fechu del so pasáu y revelar el racismu remanente nel corazón d’Estaos Xuníos. La resultancia ye esti documental qu’impactó al públicu de los festivales de Sundance y Locarno.

El orden divino (Die göttliche Ordnung, Petra Biondina Volpe – Suiza 2017). Premiu del Públicu y a la Meyor Actriz nel Festival de Tribeca 2017 pa esta comedia dramática que, amás, va ser la candidata suiza a los Oscars 2018. Xuna mirada crítica sobro la paternalista democracia helvética que nun dexó’l votu femenín hasta les acabadures del Sieglu XX. Escelente actuación del so protagonista Marie Leuenberger.

En attendant les barbares (Eugène Green – Francia 2017). Estrenu mundial de la nueva película del veneráu director francés Eugène Green. Una película nacida arriendes de una acción formativa pa mozos actores celebrada en Toulouse nel mes de mayu, na que Green vuelve demostrar el so enorme talentu pa la dirección d’intérpretes y la so mirada crítica escontra la invasión cultural venida del otru llau del océanu.

Jeannette, l’enfance de Jeanne d’Arc (Bruno Dumont – Francia 2017). Bruno Dumont firma xuna de les películes más comentaes del pasáu Festival de Cannes. Xuna ópera-rock sobro l’adolescencia d’una de les figures femenines más almiraes de la Hestoria Universal. A mediu camín ente’l relatu desmitificador y l’espiritualidá ascética, la Juana d’Arcu del cineasta francés ye unu de los biopics más singulares de les últimes décades.

La vida lliure (Marc Recha – España 2017). Marc Recha treslládanos a la isla de Menorca d’entamos del Sieglu XX pa cuntanos esta hestoria llena d’almiración pola narración clásica d’aventures y por esplicar la problemática transición de la infancia a la edá madura. Un gran Sergi López, secundáu polos debutantes Mariona Gomila y Macià Arguimbau, protagoniza esti filme trescaláu pol espíritu de Robert Louis Stevenson y William Faulkner que va tener el so estrenu mundial nel 55FICX.

Les fantômes d’Ismaël (Arnaud Desplechin – Francia 2017). Arnaud Desplechin inauguró la Sección Oficial del Festival de Cannes con esti filme, deldor de les meyores películes de Alfred Hitchcock, protagonizáu por Mathieu Amalric, Marion Cotillard, Charlotte Gainsbourg y Louis Garrel. El FICX va ufiertar la oportunidá de ver el metraxe íntegru d’esta cinta, qu’inauguró’l pasáu Festival de Cannes.

Les sept déserteurs ou la guerre en vrac (Paul Vecchiali – Francia 2017). El maestru francés Paul Vecchiali va tener l’estrenu européu del so nuevu trabayu nel 55FICX. Una farsa sobre la guerra y sobre los que traten d’evitala a la que Vecchiali otorga amás una xuguetona  perspectiva metacinematográfica.

Life Guidance (Ruth Mader – Austria 2017). Nun futuru nun mui lloñe, una sociedá aparentemente perfecta consigue que tolos sos componentes tean perfectamente optimizaos pal trabayu. Una organización llamada Life Guidance encargase de devolver a la corrada a les escases oveyes esquiciaes. Ruth Mader vuelve a Xixón en conquistando al públicu del FICX en 2003 con Struggle.

Lucky (John Carroll Lynch – Estaos Xuníos 2017). Ópera prima del estadounidense John Carrol Lynch, conocíu pol so llabor como actor en clásicos modernos de la talla de Fargo de los Hermanos Coen o Zodiac de David Fincher. Pal so primer trabayu tres les cámares, Carroll Lynch escoyó como protagonista al gran Harry Dean Stanton, no que supondría pa ésti la so última actuación antes del so murniu fallecimientu, amás de cuntar col mesmu David Lynch n’otru de los papeles principales.

On the Beach at Night Alone (Bamui haebyun-eoseo honja, Hong Sang-soo – Corea del Sur 2017). El prolíficu director coreanu Hong Sang-soo (retrospectiva FICX’13) va buscar trescalar al públicu de Xixón una vegada más con esta hestoria sobro una muyer que cavilga sobro la so relación con un home casáu. Na Berlinale 2017, consiguió l’Osu de Plata a la meyor actriz pal so protagonista Kim Min-hee.

Patty Cake$ (Geremy Jasper – Estaos Xuníos 2017). Patricia Dowbrowsky, una artista moza que quier ser estrella del rap, va tener que sobreponese al alienante entornu que la arrodia nuna barriada de Nueva Yersei, Estaos Xuníos. Ópera prima pal debutante Geremy Jasper, foi presentada con gran ésitu de públicu nel Festival de Sundance 2017, optando tamién a la Cámara d’Oru del Festival de Cannes. N’España va ser la única ocasión de ver esta película en pantalla grande, cuidao que Patty Cake nun va llegar a los cines y va tar namá disponible n’arriendu y vienta física y dixital a partir de febreru.

Patti cake

Scary Mother (Sashishi deda, Ana Urushadze – Xeorxa 2017). Ópera prima de la directora xeorxana Anna Urushadze, prenominada a los Oscar en 2018. Con influencies tan notables como’l Roman Polanski de La Triloxía del Apartamentu o’l mesmu David Lynch, la película cunta la llucha d’una madre de familia xeorxana pa cumplir el so suañu de convertise n’escritora, arrodiada d’una redolada amenazante y opresora. Premiu a la Meyor Ópera Prima y Premiu del Xuráu Mozu del Festival de Locarno. Premiu a la Meyor Película del Festival de Saraxevo.

Until the Birds Return (En attendant les hirondelles, Karim Moussaoui -Francia, Arxelia 2017). Karim Moussaoui dirixe esti percorríu pela Arxelia actual, un país nel que siguen abiertes les feríes del so tumultuosu pasáu. Trés hestories cruciaes que nos ufierten trés realidaes complementaries que van terminar xuniéndose con resultancies dramátiques. Filme de debú pa esti cineasta arxelín que los sos trabayos como cortometraxista pudieron vese en festivales tan destacaos como Clermont-Ferrand o Locarno.

Nadie nos mira (Julia Solomonoff – Arxentina, España, Colombia, Brasil, Estaos Xuníos 2017). El filme empobináu por Julia Solomonoff va ser la película de clausura del 55FICX. Una coproducción española centrada nes dificultaes d’un actor pa abrise pasu na enrevesosa vida cultural y social de Manhattan. Premiu a la meyor actuación masculina pa Guillermo Pfening nel Tribeca Filme Festival 2017. Fora de concursu.

Alive in France (Abel Ferrara – Francia 2017). El mitu del underground neoyorquín vuelve a les carreteres, nesti casu franceses, con una serie de conciertos que nos averen al Ferrara más íntimu y personal. Estrenu n’España compartíu cola Filmoteca Española. Fora de concursu.

 

Categories: Cine