El proyectu Puertu deseado de la realizadora Diana Toucedo algama’l Premiu DCP DELUXE de la primer edición del PUSH PLAY Work-in-Progress Session de les xornaes FICX Industry Days. El premiu consiste na masterización DCP del proyectu valoráu en 6.000€.

El xuráu, compuestu por Nico Marzano, xefe de programación de cine del Institutu d’Arte Contemporáneo de Londes (ICA), y Loïc Díaz Ronda, codireutor del Festival Cinespaña Toulouse, decidieron otorgar el premiu DCP DELUXE – PUSH PLAY Work-in-Progress al proyectu de Diana Toucedo. El xuráu destacó esti proyectu porque

“elementos de cine sensorial entemécense nuna personal y respetuosa investigación sobro la llucha d’un barcu y los sos marineros. Puerto deseado amuesa’l potencial pa consiguir un retratu visualmente esllumante d’una comunidá de trabayadores y la so fraxilidá.

Esperamos con interés el resultáu final que Diana Toucedo pueda consiguir una vegada complete esta obra pa la so audiencia”. Nico Marzano y Loïc Díaz Ronda participaron nel FICX Industry Days gracies al sofitu d’Aición Cultural Española (AC/Y) al traviés del Programa pa la Internacionalización de la Cultura Española (PICE) na modalidá de Visitantes.

Diana Toucedo ye cineasta y montadora gallega. Editó hasta la fecha más de 16 llargumetraxes y como direutora tien dellos curtios documentales y esperimentales. La so ópera prima, Trinta Lumes, abrió la pasada edición del OUFF. El so segundu llargumetraxe,esti Puerto deseado, ta en fase de producción. Amás, la realizadora foi direutora del focu SINAIS nel (S8) d’esti añu.

Puerto deseado ye un documental híbridu. La direutora embarca nel barcu pesqueru encabezáu pol so padre, nel que va ser l’últimu viaxe d’esti esperimentáu marín antes de la so xubilación. Diana Toucedo viaxó hasta les xelides agües del Atlánticu sur arxentín p’atopar al capitán que foi siempres un padre ausente.

Na primer edición del PUSH PLAY Work-in-Progress Sessión tamién participó In memoriam (FREEWS PRODUCCIONES), de Marcos M. Merino; Malnascuts (TEKILA MOVIES), de Gemma Blasco; This Filme is About Me (EL VIAXE FILMS), de Alexis Delgado Búrdalo, y Las letras de Jordi (SEÑOR Y SEÑORA S.L.), de Maider Fernández (fora de concursu).

 

Categories: Cine