La 20 edición d’Enfants Terribles va ufiertar al públicu más nuevu del FICX un total de 13 producciones internacionales, una d’elles fuera de competición, alloñaes del dominiu hollywoodiense para esfrutar nes sales y cavilgar y aldericar na aula.

Trece títulos del cine más nuevu que se ta faciendo en Francia, Irlanda, Alemaña o Canadá, y que se van ver equí per primer vegada n’España. Una cuidada escoyeta de películes fecha a midida de neños y adolescentes, auténticos protagonistes d’esta sección, heredera direuta del espíritu orixinal del Festival Internacional de Cine de Xixón y una de les sos señes d’identidá.



El programa más xuvenil del Festival ye un imprescindible para la comunidá educativa d’Asturies y de comunidaes cercanes dende fai casi dos décades, como lo demuestren los más de 185.000 estudiantes que pasaron peles sales d’Enfants Terribles nes sos ediciones anteriores.

Pela competición d’Enfants Terribles van pasar títulos que fueron presentaos, y en dellos casos premiaos, en festivales como Cannes, Berlín, Toronto, Locarno, Karlovy Vary, Llondres, Annecy o Giffoni. Maestros de l’animación como’l veteranu Michel Ocelot, ganador d’Enfants Terribles en 1999 con Kirikú y la bruxa; Arthur de Pins o los nomaos al Oscar Jan Lachauer y Jakob Schuh, van tar na competición al pie de les primeres obres de Chad Chenouga, Darren Thornton o Nila Núñez.

Ún de los conteníos más destacaos de la sección va ser l’estrenu européu de 100 díes de soledá, del asturianu José Díaz.

Per primer vegada, los participantes en Enfants Terribles non solo van escoyer la película ganadora, tamién van programar y van presentar una de les películes. Nesta edición, De toutes mes forces ye la película escoyida poles cuatro nueves asturianes qu’allegaron el pasáu mes de xunetu al Festival Internacional de Giffoni, unu de los más importantes del mundu para públicu infantil y xuvenil, gracies al alcuerdu establecíu ente’l FICX y el certame italianu. Elles encamentaron esta película pa la so programación en Xixón en viéndola en Giffoni (onde resultó premiada) y a elles va encamentáse-yos la xera de presentala, per primer vegada nel nuesu país.

Cartel Enfants Terribles 2017
Cartel Enfants Terribles 2017

El cartelu

El cartelu de la 20 edición d’Enfants Terribles  foi creáu por César Sánchez, autor de los cartelos de la 54 edición. D’esta obra, l’ilustrador asturianu comenta: “Queríamos tresmitir la idea d’un espectador nuevu inconformista y tresgresor. El mesmu títulu de la sección lo denota y optamos por dotar al llogu del FICX d’una figuración, tresformándolo na cabeza d’un osín de peluche perversu y, al empar, da-y tola fuerza del color, una paleta aditiva de color lluz -el cine resumides cuentes ye lluz-, añidiendo a la forma del osín la gama colores RGB, que nos tresmite tola enerxía y puxu del ciclu, enfatizándolo al usalo sobro un fondu totalmente blancu, qu’amás, ye la resultancia d’entemecer esos colores”.

Alcuentros col direutor

El Teatru de la Llaboral, el Teatru Xovellanos y el Centru Municipal Integráu Xixón Sur van acoyer los Alcuentros con direutores de les películes d’Enfants Terribles, unes cites imprescindibles colos espectadores más mozos del festival, nes que nun solo s’intercambien entrugues sobro cine, sinón tamién sobro los temes centrales de les obres. Tratar de fomentar un intercambiu d’impresiones que promueva’l sentíu críticu de los pequeños y mozos espectadores. Hasta’l momentu, yá se confirmaron alcuentros colos siguientes realizadores: José Díaz (100 díes de soledá), Nila Núñez (Lo que van dicir), Ute von Münchow-Pohl (Rabbit School), Jakob Schuh (Revolting Rhymes), Chad Chenouga (De toutes mes forces) y Kostia Testut (Sur quel pied danser), a los que se va xunir l’actriz Seána Kerslake (A date for Mad Mary).

La guía didáutica

El FICX pon un añu más a disposición de los centros participantes una serie de guíes didáutiques con más información sobre les películes d’Enfants Terribles, preguntes claves pa trabayar en clase, según propuestes d’actividaes complementaries. Estes guíes van tar disponibles en formatu dixital na web del festival y tamién se van unviar a los colexos y institutos per corréu electrónicu.

L’oxetivu d’esta ferramienta ye que los participantes en Enfants Terribles apriendan a lleer el cine, a familiarizase con una pequeña aproximación al llinguaxe audiovisual, amás de promover el séptimu arte como ferramienta pedagóxico.

Oficios del cine

Otru añu más, les alumnes y alumnos van tener la oportunidá d’afayar diversos perfiles profesionales presentes nuna producción cinematográfica gracies a la iniciativa y collaboración del Departamentu de Mocedá de la FMCEYUP y el Conseyu de la Mocedá de Xixón.

Talleres

El FICX empecipia una nueva collaboración col Festival Internacional de Cine de Clermont-Ferrand nes sos actividaes d’alfabetización audiovisual. Van desenvolvese dos talleres: Mesa de lluz virtual y Diseñu de Soníu.

Mesa de lluz virtual ye un taller qu’ufierta a los alumnos y alumnes la posibilidá de trabayar con una aplicación dixital qu’asemeya les carauterístiques d’una mesa de lluz, esto ye, tresforma la pantalla nun llenzu en blancu onde los participantes pueden usar pinceles pa dibuxar una escena d’una película d’animación.

Nel Taller de diseñu de soníu, los participantes van tener accesu a curtiumetraxes realizaos nos oríxenes del cine y a biblioteques de soníos. Por aciu l’usu d’una aplicación, los estudiantes van poder crear la banda sonora de los curtiumetraxes escoyíos.

Col sofitu del Conseyu de la Mocedá del Principáu d’Asturies y del Conseyu de la Mocedá de Xixón, el FICX va poner a disposición de los alumnos y alumnes diez equipos informáticos, facilitaos por Mar de Niebla. Los derechos d’usu de les aplicaciones, propiedá de Clermont-Ferrand, cédense de forma gratuita.

EN-CAXA-DOS. Esti taller naz como propuesta orixinal de les alumnes y alumnos de 2º de la ESO del xixonés Colexu La Corolla a partir del visionáu d’una versión de trabayu del curtiu d’animación Si nun soi nun puedo ser, de Mario Torrecillas. Esta película ye frutu d’un taller impartíu en Grecia pol direutor nel que participaron 24 neñes y neños sirios y curdos, y rellata al traviés de les sos voces, l’horror de la guerra y les esperiencies vivíes mientres la etapa de confinamientu nun campu de refuxaos. Esti taller va ser impartíu pol mesmu Torrecillas.


LES PELÍCULES d’ENFANTS TERRIBLES

100 días de soledad (Asturies), de José Díaz. Primer película asturiana nel concursu d’Enfants Terribles, constitúi un emocionante cantu a la ñatura y a la vida alloñada de la modernidá tecnolóxica. Apocayá presentada nel Festival de Jackson Hole (Estaos Xuníos).

Lo que dirán (España), de Nila Núñez. Una de les representantes españoles en Enfants y que tamién va tar na Competición Internacional Rellumes. La ópera prima de la direutora española avéranos al día ente día de dos adolescentes marroquinos que viven en Barcelona, una auténtica bofetada contra los nuesos prexuicios.

A Date for Mad Mary (Irlanda), de Darren Thornton. La ópera prima del direutor irlandés ye una comedia con sabor salao sobro la transición a la edá adulta. Basada na obra teatral 10 Dates for Mad Mary, de Yasmine Akram, llevóse dellos premios de la crítica de Dublín y de los galardones de la televisión d’Irlanda.

Ivan Tsarévitch et la Princesse Changeante (Francia), de Michel Ocelot. Una suerte de mil y una solombres d’inspiración rusa y oriental, continuación de los trabayos Príncipes y princeses (2000) y Cuentos de la nueche (2011). Con tolos personaxes en solombres chines, la nueva película d’Ocelot integra cuatro cuentos tradicionales. Habrá pase con doblaxe en direutu al asturianu.

Rabbit School (Alemaña), d’Ute von Münchow-Pohl. L’animadora de Fievel va al Oeste (1991) lleva a la gran pantalla un popular cuentu infantil d’Albert Sixtus de 1924, que narra les andances d’un coneyín de ciudá na Escuela de los Coneyos.

Revolting Rhymes (Gran Bretaña), de Jakob Schuh y Jan Lachauer. Los  direutores, dambos nominaos al Oscar por dos curtios d’animación, dan una vuelta de tuerca a los cuentos que toos conocemos de la mano del gran Roald Dahl. Fora de competición.

Zombillénium (Francia/Bélxica), d’Arthur de Pins y Alexis Ducord. Ye una de les superproducciones d’animación más esperaes de la temporada, basada nel cómic creáu pol mesmu De Pins y que foi presentada en Cannes. La película va treslladar a la mocedá a un misteriosu parque temáticu nel que solo trabayen auténtiques monstruos  vivientes.

Mountain Miracle – An Unexpected Friendship (Alemaña), de Tobias Wiemann. Ganadora de premios en Berlín y Toronto, sigue los pasos d’una adolescente urbanita pelos montes del Tirol. Como interés, una de les guionistes ye Natja Brunckhorst, que nos 80 protagonizó Yo, Cristina F., la película más rentable de la hestoria del cine alemán.

Weirdos (Canadá), de Bruce McDonald. Road movie en blancu y negru al traviés de Canadá nos años 70, con dos mozos buscando un cambéu y un incorpóreo Andy Warhol exerciendo d’animal espiritual”. Con guión del veteranu dramaturgu Daniel Maclvor (In on It), foi presentada na última edición de Berlín.

Sur quel pied danser (Francia), de Paul Calori y Kostia Testut. Comedia musical tan reivindicativa como colorista, protagonizada pola magnética Pauline Etienne (La relixosa, Edén).

Porcupine Lake (Canadá), d’Ingrid Veninger. Película que narra una preciosa hestoria d’amistá y amor veraniegu, d’esos que camuden el cursu de la to vida. Presentada nel últimu festival de Toronto.

De toutes mes forces (Francia), de Chad Chenouga. Lo mesmo la película como la obra de teatru homónima cuenta un momentu na vida del direutor. Esta película foi premiada en Giffoni y foi programada poles xuraos xixoneses qu’allegaron al certame italianu.

El libro de Lila (Colombia/Uruguai), de Marcela Rincón. Ópera prima de la direutora caleña qu’amuesa a un personaxe fora del so llibru que precisa l’ayuda del chaval que lu lleía. Un cantar al amor polos llibros y el valor de l’amistá.



Categories: Cine