A pesar de dedicar un artículu enteru al Royal Concert Hall por tolos conciertos que vimos nesi escenariu, la selmana entamaba n’otru puntu de la ciudá, la sala O2 ABC. Casi recién llegaos, acreditaos como prensa y coles entraes na cartera díbemos asistir al conciertu de The White Buffalo que pasaba per Glasgow dientro de la so xira europea. The White Buffalo ye l’alter ego de  Jake Smith, que se fizo entá más famosu internacionalmente pola so apaición na serie Sons of Anarchy col tema “Come join the murder”. Jake creció escuchando música country y punk, y el so estilu podíemos definilu como una mecigaya de blues, country y rock.

Acompañáu d’un batería que yera como una apisonadora y un virtuosu del baxu, Jake Smith metióse al públicu nel bolsiellu yá nes primeres canciones, combinando perbien temes llentos con cañonazos rockeros.  The White Buffalo sorprendió dende la primer canción pola potencia de les sos canciones. L’últimu discu editáu ye del 2015 asina que yá hai ganes de que saque daqué nuevo. Acompañólu na nueche Jarrod Dickenson, cantautor country más clásicu, que fizo una bona intro pal son de The White Buffalo.

Munchos díes pel centru de Glasgow pidíen un poco de variación, y una pequeña escursión pel West-End col oxetu de siguir viendo más conciertos yera bona idea.

Pa llegar al pub Oran Mor (antigua ilesia reconvertida en sala de conciertos) garramos a derechu la cai Sauchiehall hacia l’oeste. Tamién ye fácil garrar el metro, opción interesante y ensin pérdida porque en Glasgow namás hai una llinia circular que se divide nos dos sentíos, inner y outer, practicidá y economía! Optando pol paséu, vamos viendo como l’ambiente se tresforma mentanto avanzamos pal oeste. El West-End glaswegian ta convirtiendose por mor de la tan de moda xentrificación nun barriu elitista. Antaño’l barriu foi llugar d’acoyida pa xente de les highlands y un potente reductu del gaélicu na ciudá, l’ambiente de dellos pubs yera plenamente gaélicu-falante y va años paecía más bien un Inverness o Ullapool en miniatura nel mediu del sur d’Escocia.

Tiendes delicatessen, restaurantes gourmet que desanicien los tradicionales pubs, subida de precios na vivienda… La tónica dominante na mayoría d’Europa nos barrios que se ven afectaos por esti nuevu fenómenu de la globalización.

Magar d’ello, l’Oran Mor ye un espaciu guapu pa conciertos. Los recitales cellebrense nel sótanu del llocal y tien una capacidá pa unes 150-200 persones. El motivu d’esta visita yera’l conciertu de los americanos Darlingside y Adam Holmes & The Embers. Coles entraes escosaes dende la selmana anterior al conciertu, entamaba la nueche’l cantante de los conocíos Rura, Adam Holmes cola so banda, The Embers. Equí espláyase nun ambiente muncho más pop/rock, lletres propies, melodíes tranquiles arropaes por baxu, guitarra, batería y teclaos. Conciertu guapu y tranquilu sacante temes más movíos como “People come people go”, que ye’l single principal del so segundu discu “Brighter Still”. Adam Holmes nun ye l’allegría personificada nes presentaciones pero la so voz ye una de les más guapes del panorama escocés d’anguaño. Una cosa compensa lo otro.

Darlingside son la nueva sensación de lo que nos EEXX denominen indie-folk. Cuatro componentes establecíos en Massachusetts con Don Mitchell a la guitarra y el banyu, Auyon Mukharji, mandolina y vigulín, Harris Paseltiner , guitarra y cello, David Senft, baxu y bombu. Amás d’ello toos canten, la voz tien un pesu principal nel grupu y faen unes harmoníes vocales precioses, a vegaes complicaes de facer pero bien guapes d’escuchar. Bebiendo de fontes como’l bluegrass americanu más clásicu, folk de los ’60, música clásica, pop o indie d’anguaño’l resultáu ye una mezcla curiosa a mediu camín ente’l folk, el pop y l’indie.


L’acoyida del públicu de la sala foi espectacular, ellos mesmos taben sorprendíos na so primer visita a UK de los llargos aplausos na presentación del so discu “Birds Say”. Los folkis agora toquen con baxos Rickenbacker, y de qué manera…. La puesta n’escena tamién ye guapa y sigue un poco la moda del folk per tierres americanes, los cuatro músicos cantando a una, arrodiando un solu micro de condensador que-yos da un soníu especial.

Volviendo del west-end camín del centru pela nueche, el Festival Club pilla de pasu y ye un escenariu de referencia nel festival. La escuela d’arte de Glasgow asitiada na famosa Sauchiehall enllenase de tolos músicos del día nun ambiente más relaxáu. Na planta baxa del edificiu hai chigre y suelen concentrase músicos mozos de sesión mientres, na planta d’arriba, se preparen los conciertos. Mini-conciertos d’unos venti minutos nos que nun ye raro qu’unos músicos y otros d’estremaos grupos se mezclen. Ye bon sitiu pa sentir nuevos grupos, como foi’l casu de The Elephant Sessions.


Si l’añu pasáu nos dexaba con gran murnia, el vigulineru y alma mater de Shooglenifty, Angus Grant, The Elephant Sessions lleguen pa remendar la so ausencia. Tienen un soníu bien averáu al autonomáu acid-croft de los primeros, con Alasdair Taylor a la mandolina puntiando los ritmos del quintetu. Neo-trad, asina clasifiquen la música que faen y nun dexa de ser verdá, melodíes tradicionales llevaes a la modernidá col sofitu d’un combu de guitarra llétrica, baxu y batería qu’acompaña a la parte más folki del grupu formada por vigulín y mandolina. Sorpriende la mocedá del grupu d’Inverness que punxo a botar (lliteralmente) al públicu del Festival Club el vienres nueche. Tienen un discu nel mercáu, “The elusive Highland beauty”, altamente recomendable.

Aparte d’esto y en tres díes de Festival Club que pase ellí (el festival club abre de xueves a domingu) bien de grupos pasaron poles tables. Le Vent du Nord & De Temps Antan, Anxo Lorenzo, Ross Ainslie & Ali Hutton cola xira “Made in Pertshire” qu’axunta a dellos músicos de la ciudá del mesmu nome, Fara, el músicu de la Banda Europa Slobodan Trkulja, Session A9… Ensin dulda ye un perbon sitiu pa tomar les últimes pintes del día nun ambiente plenamente Celtic Connections.

Yá de llunes, aprovechando los últimos díes en Glasgow, encaminábame hacia l’este. Al llau de la mítica sala Old Fruitmarket, nel City Halls, actuaba’l dúu formáu por Aidan O’Rourke & Kit Downes. Si tuviere que definir el conciertu nuna sola pallabra, ensin nenguna dulda sería “sensibilidá”.

Les composiciones d’Aidan de siempres sorprenden, tanto col trío LAU o nos sos discos en solitariu, pero nel acústicu de la pequeña sala na que tocaron, de paredes y techos blancos y illuminación suave, l’ambiente yera toa una delicia. Aidan al vigulín como siempres y Kit Downes al pianu y órganu ficieron una hora y pico de música na que combinaron testos proyectaos na paré de la sala pa dir lleendo al tiempu o bien recitaos por dellos collacios de los dos. Como “Do people still do this?”, una pieza composición d’Aidan preciosa, anunciada como una respuesta musical al llibru 365 del autor escocés James Robertson. Relatos del día a día que xeneren pieces como esta.

Un pieslle de luxu pa una sobredosis de conciertos, muncha música qu’asimilar, algún discu na mochila pa escuchar pausadamente en casa y sacar coses que se pasen por altu nel direuto.

Repetimos??

 

*toles semeyes, Raúl García, sacante Darlingide (www.darlingside.com) y the elephant sessions (www.elephantsessions.com)
Categories: Música