El Celtic Connections tien munchos escenarios repartíos per tola ciudá, casi ún en cada zona, qu’”obliguen”al visitante a pasiar bien la ciudá si quies escuchar varies coses los díes que tes ellí. Amás d’esto, los escenarios nun son mui monotemáticos y ta bien compensada la ufierta d’estilos. El Celtic Connections como yá comentamos nel anterior artículu combina grupos indie, pop, folk, bluegrass, jazz… Casi toa triba de grupos tienen cabida en Glasgow esos díes.

Sicasí, ún de los escenarios que más rescampla ye’l Royal Concert Hall (GRCH), un auditoriu imponente xusto en mediu de la ciudá, nel cruce de les cais Sauchiehall y Buchanan, dos exes vertabraores del centru. Foi construyíu a finales de los años 80 y inauguráu en 1990. Ye un auditoriu nel que ta perbien aprovecháu l’espaciu, dividíu en delles sales. La selmana de vërtigu (nunca meyor dicho pola cantidá de conciertos que me disponía a ver en selmana y picu de festival) nel GRCH entamaba de miércoles nel escenariu principal col conciertu “The Unusual Suspects & Carlos Malta”.

The Unusual Suspects ye una banda que tien un pocu d’orquesta y otru pocoñín de folk, un combo grande de músicos folk na mayoría tocando arreglos bien interesantes. Depués de dellos años de parón, volvíen a los escenarios gracies al enfotu de los festivales Celtic Connections de Glasgow y Celtic Colours na islla canadiense de Cape Bretón, que quixeron retomar la idea d’un gran grupu amestando músicos d’ambos llaos del atlánticu. La direición musical cuerre al cargu del pianista David Milligan y l’arpista Corrina Hewat, que llideren el gran grupu de más de 25 músicos, acompañaos nesta ocasión por tres cantantes ente les que llamaba l’atención la xoven Mischa Macpherson, conocida por otros proyectos personales reconocíos yá, magar la so mocedá.

 

The Unusual Suspects destaquen pola seición de vientos que-y da un gran dinamismu a los arreglos, el conciertu foi toa una master-class d’igües pa música folk ensin caer en coses trillaes anque tampoco volando la cabeza a los asistentes con igües contemporánees. Coses bien feches y con munchu gustu, bien de pieces clásiques nel repertoriu, tocando delles de los sos dos discos nel mercáu, “Big like this” y “Live in Scotland

Enantes d’ellos, abría’l conciertu’l flautista brasileñu Carlos Malta, frutu de la collaboración del Celtic Connections y el festival brasileñu MIMO. Carlos Malta y la so banda Pife Muderno xunen la música tradicional brasileira con aires jazzy, funky… Carlos Malta tien tocao con musicazos de la talla de Pat Metheny, Caetano Veloso, Gilberto Gil, Marcus Miller… como se suel dicir, si’l ríu suena, agua lleva. Y nun tuvo nada mal el conciertu que se marcó colos suyos, acompañando a les flautes con tres percusionistes, foi una apertura de luxu pal posterior conciertu de The Unusual Suspects.

El xueves llegaba, entá con más fuerza, el conciertu de Basco y Talisk. Los primeros, Basco, son un cuartetu danés pero con multiculturalidá de componentes. Fueron toos amigos y alumnos de la Carl Nielsen Academy d’Odense (Dinamarca) y pola cabezonería d’Hal Parfitt-Murray (vigulineru) acabaron tocando lo qu’ellos denominen folk pan-atlánticu, amiestu de cultura nórdica con folk más averáu a Escocia/Irlanda. Dos vigulinos, curdión cromáticu/trombón y bouzuki de diez cuerdes. Composiciones complicaes y con munchu aire nórdicu matizáu, que daben pasu al xoven grupu escocés Talisk.

Talisk son Moshen Amini cola concertina, Hayley Keenan col vigulín y Craig Irving a la guitarra. Anque enforma mozos y con solo un discu que presentaben nel Celtic Connections, el grupu tien yá bien de premios na vitrina, foron nominaos nel añu 2015 al Up and Coming Artist of the Year nos MG Alba Scots Trad Music Awards y Moshen foi gallardonáu en 2016 col BBC Radio Scotland Young Traditional Musician of the Year que recueye la trayectoria personal musical de los nuevos talentos del país.

Talisk, son una de les últimes grandes revelaciones del folk n’Escocia, y el conciertu que se marcaron tuvo a una gran altura, munches composiciones propies de los tres, con unos arreglos rápidos, cañeros pero mui musicales al mesmu tiempu. Tou ello recoyío nel so primer discu “Abyss”, dempués d’un EP tituláu “Pinnacle 67” que yá facía ver a les clares qu’esti grupu diba dar que falar. Gran conciertu del tríu, la guapísima Strathclyde Suite enllenóse de públicu pa ver la hora y picu de música qu’ufiertaron con Moshen a la cabeza, tou un showman con gran fuercia non solo musical. Les presentaciones cuerren al cargu d’él y nun duda un momentu en facer chancia col públicu a la mínima que se tercia, provocando gran complicidá ente l’escenariu y los asistentes.

De vienres yera’l turnu pa los clásicos Four Men and a dog y los mozos Ímar. Four Men and a Dog ye una banda perconocida, con una trayectoria bien llarga, entamaron a tocar yá en 1990, con una formación estable dende entós na que solo cambió’l guitarrista. El grupu de Donal Murphy, curdioneru del grupu, que ye quicias quien más lleva’l pesu melódicu del grupu fizo disfrutar al públicu d’un conciertu llargu e intensu con temes instrumentales y dalgún cantáu pol guitarra acompañáu de Gino Lupari (bodhran) a los coros.

Ímar, otru de los grupos revelación de la temporada n’Escocia. Los sos miembros son yá referentes y tienen tocao o toquen con otros grupos como Manrán, Rura, o Barrule. Vieyos amigos conocíos de session en session pelos chigres de Glasgow, decidieron xuntase pa facer un grupu de folk al estilu más modernu que se ta llevando anguaño en tol Arcu Atlánticu. Folk rápidu, enérxicu, dacuando con dellos tintes pop na melodía o la voz, y que conecta perbien col públicu mozu que llena los conciertos.

Ímar, presentaba nesti conciertu’l so primer discu “Afterlight”, que llegaba con gran espectación  dempués del revuelu causáu nes redes sociales pol adelantu del tema “l’air mignonne”, qu’en pocos díes algamaba milenta reproducciones en youtube y facebook. Bodhran, vigulín, concertina, uilleann pipe y guitarra faen un grupu qu’esperemos dure munchos años, porque’l so conciertu nel New Auditorium del RGCH foi pa enmarcar. Composiciones cañeres d’autores mozos de música folk (Padraig Rynne, Tomas Callister, Damien O’Kane…) y bon rollu nel escenariu dan como resultáu discazos como “Afterligth”, de xuru qu’ún de los meyores discos folk del añu 2017.

El sábadu pela mañana, el GRCH enllenábase de gaites cola Inveraray & District Pipe Band y los bretones Bagad Kemper. Abríen fueu los segundos presentando’l so caberu espectáculu “Melezour” (espeyu, en brezhoneg). El bagad, acompañáu de Tibo Niobé a la guitarra, Erwan Volant al baxu, Bernard Le Dreau al saxu, y los cantantes Sylvain Girault y Marthe Vasallo, fizo un espectáculu guapu y mui bien de soníu gracies a l’acústica de la sala. Yera la segunda vez que veía esti conciertu, depués de la so presentación nel FIL de Lorient y ye una gran apuesta pola teatralización de la música por parte de la banda quimperois.

De siguío, actuó la banda escocesa Inveraray & District, llevada na direición por Stuart Lidell y Steven McWhirter. La formación nun defraudo en cuanto a soníu, nun dexa de ser una de les bandes más potentes de grade1 n’Escocia y de les que tan nel top ten a nivel mundial. Sicasí, el conceptu de conciertu quedo un poco probe. L’espectáculu foi una socesión de sets bien tocaos pero ensin un nexu en común. Nun ye que la banda nun sepa facelo, como demostraron na presentación va años del so únicu discu nel mercáu pel momentu, Ascension. Saben facelo y bien, pero nesta ocasión quedo-yos un poco coxu.

El domingu, llegaba la participación asturiana. Primeramente, Xabier Díaz y las Adufeiras de Salitre, presentaben al públicu del Celtic Connections el so últimu discu “The Tambourine Man”. Reforzaes na melodía por vigulín/zanfona y curdión diatónica, les voces de les Adufeiras y Xabier Díaz facíen una entrada perguapa nel Celtic. Xotes, maneos y cantares de Galicia, polifonía tradicional pura y dura bien llevada al direutu. Dempués d’escuchalo en discu ensin que me llamase muncho l’atención, pueo permitime dicir qu’esti trabayu gana munchu en direutu. Final guapu col “Pasodoble de Beo”, nel qu’intentaron que’l públicu corease una parte y diese palmes.

La Banda Europa subía a l’escenariu dempués, cola participación de los asturianos Guillermo Fernández (gaita), Natalia Nuño y María Gavieiro (pandereta). La Banda Europa pretende ser un proyectu de mestizaxe de cultures, incorporando na so formación músicos de munches zones baxo la direición de Rick Taylor, pero cola composición y direición artística de Jim Sutherland. Diz l’escritor xaponés Ryunosuke Satoro qu’invididualmente nosotros nun somos más qu’una gota d’agua, pero xuntos somos un océanu, y esi foi’l lema del conciertu qu’ufiertaron, “we are an ocean”. 36 músicos p’algamar un mesmu fin, llevar a la práctica la música de Jim Sutherland.

Foi un conciertu qu’a pesar de qu’en dellos momentos llegaba a resultar demasiao complexu y densu en cuantu a arreglos orquestales, supieron facer llegar al públicu música bien llevada, con tol color de la bayura d’instrumentos presentes nel escenariu. Dende nyckelharpes a gaites asturianes y gallegues, curdiones, duduk armenios, zanfones o dulzaina valenciana. Ye posible, y ye bien necesario nestos tiempos cola amenaza del brexit, el pieslle de fronteres y mil problemes más amenazando la convivencia, un soplu d’optimismu musical que dempués d’una hora de conciertu finaba llevantando a los asistentes de la butaca en dos ocasiones y rematar los llargos aplausos col tema principal del conciertu “We are an ocean” coreáu pol públicu y los músicos de la banda.

La Banda Europa, asina mesmo, aprovecho la so estancia esa selmana en Glasgow pa la grabación d’un discu que verá la lluz próximamente gracies al crowfunding del que podéis tar al tantu na web www.kickstarter.com/profile/labanda

Como veis, ún de los puntos neurálxicos del Celtic Connections tien abonda actividá tolos díes, y ye llugar de pasu obligáu. Los discos de tolos grupos qu’actuen tan disponibles na tienda qu’instalen ellí mesmu, y na tienda oficial del GRCH ta disponible tamién el merchandaising oficial del festival. Amás d’ello, tolos díes hai dellos puestos de luthiers que van rotando, un día pues topate con un facedor de gaites, otru con un afinador de curdiones y al otru con un facedor de vigulinos.

Y si nada te convence… reláxate, pide un té na cafetería pa calecer y echa un vistazu al programa, de xuru que topes daqué interesante que se te paso per altu.

Categories: Música