Dende la dirección de la Selmana del Audiovisual Contemporaneu d’Uviéu (SACO) van adelantándonos cosines d’esta tercer edición que va tener llugar ente’l 10 y el 19 de marzu na capital asturiana:

La tercer Selmana del Audiovisual Contemporaneu d’Uviéu va entamar la so tercer edición nel Teatru Campoamor cola première del documental “Rodrigo Cuevas. Campo y tablas”, de Manuel García Postigo y Ojos de Hojalata. Nun va ser ésti l’únicu estrenu de SACO qu’acueya’l Campoamor. El certame súmase a la celebración del 125 aniversariu del coliséu uvieín con dos espectáculos de producción propia: ImproVisión y l’audiudrama ¡Saca! ¿SACU? (El spaghetti western). El programa escénicu va completase con El Agitador Vórtex, película multixéneru que se va rodar y exhibir nel escenariu del propiu Teatru Campoamor. La entrada de tolos espectáculos ye de baldre.

Rodrigo Cuevas. Campo y tablas

(première)

de Manuel García Postigo y Ojos de Hojalata, España, 2017)

Teatru Campoamor, vienres 10 de marzu, 20:30 h

Première del documental dirixíu por Manuel García Postigo y Ojos de Hojalata, y producíu por Álex Zapico. Rodrigo Cuevas va ser el maestru de ceremonies d’esti estrenu absolutu: el públicu va poder esfrutar de dellos temes incluyíos n’El mundu por montera, el so segundu espectáculu en solitariu.

“Rodrigo Cueves. Campo y tablas” nació va un añu, cuando Manuel García Postigo y Álex Zapico conocen al músicu asturianu y empiecen a siguilu en delles actuaciones. Danse cuenta de que tres el personaxe de Rodrigo Cuevas había un gran músicu con un gran bagaxe. “Asina que nos llanzamos a una aventura que diera a conocer al Rodrigo qu’había detrás de les madreñes y del xaqué y, la verdá, la esperiencia nun pudo ser más enriquecedora”, cunta’l direutor, quien conclúi que “la idea del documental ye ufiertar un retratu cercanu y íntimu del artista: les sos aspiraciones, los sos mieos, los sos suaños…”.

Al finar el pase, va haber un alcuentru col públicu nel que van participar Rodrigo Cuevas, Manuel García Postigo y Álex Zapico.

 

El Agitador Vórtex

(estrenu n’Asturies)

Espectáculu de Cristina Blanco a mediu camín ente’l teatru y el cine.

Teatru Campoamor, miércoles 15 de marzu, 20:30 hores.

“El Agitador Vórtex” ye una película multixéneru de cine “fecho a mano” rodada y montada en direutu nel escenariu, cunta la so creadora. “Ye un thriller cómicu-musical de ciencia ficción con toques de terror y aición con karaoke románticu y artes marciales en traxe rexonal nel que la moza llucha contra’l mal”, esplica Cristina Blanco.

Nesti homenaxe al cine y a la escena, Cristina Blanco parte del deséu de trabayar con distintos xéneros y formatos cinematográficos, escénicos y musicales analizando les convenciones de caún pa poder cuestionar les sos normes y los sos mecanismos particulares. ¿El resultáu? “Un colax en vivu de xéneros que dialoguen ente sí mesmos, rompiendo colos códigos que los conformen, cuestionando la natura de los mesmos y xugando a camudar les sos normes”.

¡Saca! ¿SACO? (El spaghetti western)

(Producción SACO, estrenu absolutu)

Audiudrama dirixíu por Federico Volpini.

Teatru Campoamor, sábadu 18 de marzu 20:30 hores

Audiudrama sobre la película de Sergio Leone El bonu, el feu y el malu. Nel escenariu del Campoamor, un grupu d’actores, encabezaos pol periodista y escritor Federico Volpini, y La Bande presenten un espectáculu qu’entemez el cine, la música y el radiuteatru. ¿El so oxetivu? Rindir un particular tributu a una de les obres maestres del creador del spaghetti western.

Foto: Julio Calvo González

ImproVisión

(Producción SACO, estrenu absolutu)

Improviso + cine surrealista.

Teatru Campoamor, domingu 19 de marzu, 20:30 hores

El colectivu artísticu Improviso intervién cola so música sobre tres pieces capitales del cine surrealista:

  • Un perru andaluz, de Luis Buñuel
  • Ballet mécanique, de Fernand Léger
  • Le retour à la raison, de Man Ray

L’ ensemble intuitivu Improviso, col so enfotu por esplorar lo astracto y el surrealismu al traviés de la música y la danza, ye’l conxuntu ideal pa reinventar en direutu les bandes sonores d’estes trés películes clásiques de Buñuel, Léger y Man Ray. Utilizando la improvisación llibre y conducío, l’ensemble promete ser una ponte ente la vanguardia del presente y la de casi un sieglu.

Categories: Cine