Oculta la so identidá con un pseudónimu porque según el «nun fai falta tener información del artista p’apreciar el so arte». Señor X suel facer les sos obres en delles ciudades d’España y del extranxeru y los sos graffitis van cargaos de crítica social. Munches veces da la vuelta al significáu de dellos anuncios publicitarios y los tresforma hasta consiguir lo que quier dicir.

 ¿Cómo empieza Señor X a interesase po arte urbanu?

Cuando empecé, nun sabía muncho sobre street art y tampoco conocía a naide que pintara na calle. Un día fixi una plantiya pequeña, vi que se-y podía sacar xugu y a partir d’ehí yá me metí més nel tema.

– ¿Pasasti per esa etapa inicial de graffitear firmes o yá, de mano llanzástite a crear coses con más sentíu y mensaxe social?

Nunca pintá tags nin bombing, pero cuando empecé tampoco pensaba muncho nos temes que trataba, namás cortaba lo primero que se me ocurría y salía a pintalo, lo que ta bien, porque salen chorraes mui fresques y divertides, depués empecé a pensalo un poco más (a veces). Eso ye bono y malo a la vez

– ¿Qué ye lo que busques tresmitir colos tos diseños urbanos?

Pa mi ye la meyor forma que tengo d’espresar lo que pienso. A veces son más de broma y otros más críticos, según como tea nesi momentu. Gústame que-y preste a la xente y que los faga reflexonar un migayín, tamién. Pero sobre manera fáigolo porque necesito facelo para sentime bien y sacar lo que tengo dientro

– ¿El arte, ye la meyor manera de reivindicar que la cai ye nuestra?

Nun sé si ye la meyor, pero ye una de les maneres, y creo que ye bona. Tamién me parez que cuando la cosa pónse más fastidiada, como ta agora mesmo y dende hai tiempu, hai que pasar un  poco del arte y del Facebook y de too eso y dar caña como más daño se faiga, (anque pareza que nun lo faga muncho) con movilizaciones, fuelgues, verdaderes manifes, insumisiones, etc. Dexar el pincel y el ratón y garrar los palos.

– A parte de sacanos de lo cotidiano y l’aburrimientu ¿cuál crees que ye la principal función que cumple l’arte urbanu?

Nun creo que l’arte tenga que tener nenguna función. A mi valme pa espresame, purgame y sentime bien. Ver pieces pela cai tambén me pon mui contentu.

– ¿Si esta forma d’espresión artística dexara de ser en cierta manera clandestina, diba parte del so encantu?

Ye verdá que pintar illegalmente tien munchu encantu, pero poder parate y echar el to tiempu con una muria llegal tamién lo tien. En mi opinión, lo importante ye facelo, da igual cómo y dónde. Hai muncha xente mui bono que namás pinta muries llegales, y non por eso-yos dexa de considerar artistes urbanos.

– ¿Por qué l’arte urbanu nun ta lo suficientemente valoráu?
Yo creo que si lo ta, polo menos dientro d’un circulu bien grande, que cada vez crez más. Tamién ta la parte de daños contra la propiedá y eses coses, que dan una visión negativa del conxuntu.

– Hai munchos tipos d’artistes urbanos, pero ¿con cuál t’identifiques meyor? ¿Cómo te definiríes?

La verdá ye que siempre digo que pinto na cai, y ya ta. Nun siento la necesidá d’etiquetame. La mayoría del mio trabayu ta fechu con plantiyes, asina me podía definir como ún que nun quier dibuxar…

– Siempre te comparen con Banksy, dalgo nada malo, d’otru llau. ¿Cuales son los tos artistes urbanos de cabecera?

Lo de Banksy ye porque ye l’únicu que conoz la xente, pero hai muncha xente pintando con plantiyes ehí fuera.

En cuantes a los referentes, veo una gran cantidá de pieces cada día de tou tipu d’estilos y de muncha xente distinta, les que puedo na cai y muches n’Internet, y de toes elles intentes aprender un poco, un poco d’equí y un poco d’allá. Por dicite unos pocos, en cuanto a idees, gústenme mucho Oak Oak o Mobster y en cuantes a estilos, Meggs y Connor Harrington son increíbles. Tolo que monta Spy o lo que pinta Aryz ye d’un nivel escomanáu. Hai munchos artistess de los qu’aprender.

– Asturies, Londres, Madrid, Barcelona, París… son namás unos pocos sitios onde podemos encontrar les tos creaciones. ¿Por qué nun llega el street-art al mundu rural? ¿Diba ser una contradicción que lo ficiera?

Como dixi enantes, lo importante ye pintar, nun importa ónde. Yo tengo fecho pieces en mediu’l monte, como muncha otra xente, onde poca xente les va ver. Creo que búscase la ciudá por una cuestión de visibilidá y, si vives ellí, de comodidá.

SeñorX
Sr.X

– Últimamente muéveste ente Asturies y Londres, ¿son mui grandes les diferencies, en cuantes a la cultura graffitera, ente un sitiu y otru?

La diferencia más grande ye la xente que pinta nun sitiu o n’otru. Tol mundu quier venir a pintar a Londres, porque ye una de les cunes del street art. Sales a la cai, das dos pasos y atopes coses de los meyores. Eso, ta claro que ye bono, porque  motívate y t’incentiva.

– ¿Ónde prefieres llevar adelante la to obra, nuna gran ciudá o nun sitiu más pequeñu como Xixón? 

Siempre presta pintar nun sitiu grande, porque lo puede ver más xente, amás, si ye fuera, atpes otros entornos distintos a los que tas avezáu y eso tamién ta bien; pero pintando’n Xixón siéntome mui afayáu y pienso siguir dándo-y abondo per ahi…

 

Categories: Plástica