D’ente’l ruíu surde la música. Nun ye’l ruíu l’oxetivu nin el fin, sinón que ye onde apaez y medra. Sobre esta música electrónico industrial, ente influyencies primeres declaraes –Suicide, Whitehouse, Esplendor Geométrico…–, ente pallabres imaxe que podemos siguir a lo llargo de los sos temes –el baille, la nueche, cristales de cobaltu…– naz la música de la Fase, mutación de proyectos anteriores con vocación d’eternidá.

Cuasi venti años pasaron yá dende Goodbye, l’apuesta de Roberto Lobo y Ernesto Avelino pol ruidismu y la música industrial, dalgo que dexaría pasu en xunu de 2006 al actual proyectu d’esta xente de Mieres. Too ello dientro d’una evolución adulces, camín de les propuestes últimes del so discu acabante salir Salsa de cuervo col sellu asturianu Discos Humeantes, col que yá sacaron en 2011, A la quinta hoguera. Esti discu punxo nel mapa sonoru d’esta triba de música’l llabor d’Ernesto y R. Lobo. Pasaron d’aquellos años de meter mieu a la poca xente que s’atrevía col ruidismu estremu de Goodbye, o de proyectos anteriores, a tener la Fase daqué nome ente l’underground y lo moderno autóctono y d’ehí a un públicu cada vegada más amplio y heteroxéneo, de la mano d’una falsa domesticación musical, nun camín quiciabes buscáu adré dende la esperimentación, onde’l ruíu crudo pasa per una ellaboración y l’adoma per mediu de la voz, protagonista d’estos dos discos, en busca de nuevos espacios.

Ye malo d’entender, pa la xente que venimos d’otres escenes o d’otros gustos musicales, qué ye Fasenuova, a qué suena’l so ruíu y qué ye lo que fai que llame l’atención a la xente esta música.

Tampoco nun lo igua, nesti casu, l’amistá y el tratu con ellos y, sicasí, dende la distancia musical, presenten una propuesta sonora que trescala lo industrial o postindustrial y quier recuperar, como dixeron en Mapa Sonoro, l’espíritu tresgresor y subversivu del vieyu rock’n’roll –inclusive lleguen a declarase los auténticos rockers…– y el tema “Salsa de cuervo” del últimu discu bien pue valir d’exemplu d’esto. Ye per esi camín onde paez que pue empatar la so música colos gustos propios más clásicos pola música de los 60s o del garage¸ al fin y a la postre ruíu naquella dómina pa munchos… o los más amplios del submundu modernu y electrónicu. Si acudimos a les entrevistes y artículos sobre ellos, milenta nos últimos tiempos, buscando esta esplicación pa entendelo, entá podríamos salir peor paraos: énte lo densu y ellaboráu del discursu estéticu y musical de Fasenuova y les metáfores, cucurrabucos y el llinguaxe técnico-barroco de los duechos na materia, la cuestión nun meyora. Pa ello, pa definir la so música, valgan acaso les sos propies reflexones. Nelles, Roberto y Ernesto afirmen que nun son músicos, que lo que faen entós ye música popular, garrando bases ya influencies d’un refileru de músiques distintes que conocieron: fíos declaraos del industrial, la electrónica del baille o’l techno xunto col rock o’l punk…una fusión de milenta coses, pero que “lo que facemos nós ye mui personal… vamos un pasu más alantre de les influencies pa tratar de facer dalgo identificable como nuestro, fecho por Fasenuova”.

Son minoritarios, sábenlo, pero nun tienen vocación d’ello y asina lo dicen, nun quieren ser raros o incomprendíos, anque per agora seyan referencia nuna minoría creciente. Constrúin pasu ente pasu, esi camín que los va llevando del ruidismu estremu a un soníu propiu, industrial, sin escaecer los elementos ruidistes ya hipnóticos presentes nel últimu trabayu, Salsa de cuervo; nueve cantares que, según les sos pallabres, ye la propuesta “d’un viaxe continuu de dir y volver ente’l monte y la ciudá, ente los cuervos y los coches, ente les viesques y los edificios, ente les peñes y los aeropuertos”. Asina y too, inda fuxendo d’etiquetes y agrupaciones en tribus, corrientes y subxéneros, la so música ye, per agora, pa una minoría cada vegada más amplia.

Pero, a lo cabero, ye en direuto onde Fasenuova ye más La Fase, onde’l ruíu faise verbu y onde ye más evidente la so música y la so actitú, el motivu del xorrecer del so nome y la so apuesta sonora: una invitación a un paisaxe sonoru impactante que recrea en sales y llocales atmósferes d’un ruíu cercano y escuro, industrial y asturiano, d’un color cobalto.

 

Categories: Música